Хакери успеале да преземат голем број влијателни профили на „Instagram“ така што едноставно го измамиле официјалниот асистент со вештачка интелигенција на компанијата „Meta“. Според порталот „404 Media“, напаѓачите искористиле безбедносен пропуст во автоматизираниот систем за поддршка. Тие буквално го замолиле „Meta AI“ ботот да ја промени е-поштата поврзана со профилот на жртвата и на тој начин добиле пристап до корисничката сметка.
Како едноставен трик измамил напреден систем за поддршка
Напаѓачите најпрво користеле VPN мрежа за успешно да ја лажираат локацијата на сопственикот на целниот профил. Потоа му испратиле кратка порака на ботот со барање да ја поврзе нивната нова адреса за е-пошта и го навеле корисничкото име на жртвата.
Вештачката интелигенција автоматски испратила линк за ресетирање на лозинката на адресата на хакерите, без каква било дополнителна проверка на идентитетот.
„Meta“ ја укина човечката поддршка и создаде хаос
Претставникот на „Meta“, Енди Стоун, се огласи на мрежата „X“ и потврди дека овој безбедносен пропуст бил итно отстранет. Сепак, оштетените корисници тврдат дека воопшто немале можност да контактираат со вистински оператор по кражбата на нивните профили.
Проблемот настанал откако технолошкиот гигант отпуштил повеќе од 8.000 вработени со цел да го пренасочи фокусот кон системи базирани на вештачка интелигенција, кои, според критичарите, сè уште не биле подготвени за ваква улога.
