Додека едни го бранат смелиот изглед на новиот модел „Luce“, други сметаат дека на автомобилот му недостига карактерот што традиционално се поврзува со брендот од Маранело. Сега во целата приказна се вклучи и тјунерската сцена, која ќе се обиде да ја „исправи“ ситуацијата.

Една од првите компании што се обиде да замисли како би можел да изгледа „Luce“ по преработка е „Venuum“ од Обединетите Арапски Емирати, позната по своите „body kit“ пакети за егзотични автомобили.

„Venuum“ веќе ја подготвува својата визија за „Luce“

„Venuum“ во својата понуда веќе има пакети за преработка на модели како „Ferrari Purosangue“ и „Rolls-Royce Wraith“, а наскоро планира да претстави и дополнително проширена верзија на „Bugatti Chiron“. Сега вниманието го насочи кон новиот електричен модел на „Ferrari“ со пет седишта.

Компанијата објави рендери кои го прикажуваат „Luce“ со целосно нови карбонски елементи на каросеријата. Резултатот е значително поагресивен автомобил, но многумина ќе забележат дека и понатаму му недостига класичниот дизајнерски израз на „Ferrari“.

Според дел од набљудувачите, автомобилот сега повеќе наликува на модифицирана јапонска спортска лимузина отколку на луксузен италијански електричен модел.

Промените започнуваат уште на предниот дел од возилото. „Venuum“ предвидел голем карбонски сплитер и дополнителни аеродинамични крилца, додека предните крила се проширени за автомобилот да добие помоќен и понаметлив изглед.

Додадени се и карбонски прагови, а необичните отвори на предните врати исто така се изведени во видливи карбонски влакна за дополнително да се нагласи спортскиот карактер.

Ниту задниот дел не останал непроменет. На рендерите, „Luce“ доби големо фиксно задно крило и масивен дифузер, исто така изработен од карбонски влакна. Заедно со проширените крила, сето тоа му дава значително поекстремен изглед во споредба со серискиот модел.

Има ли заинтересирани?

Засега не е познато дали „Venuum“ навистина планира да произведе „body kit“ идентичен на оној прикажан на рендерите. Сепак, со оглед на интересот што владее за првиот електричен модел на „Ferrari“, речиси е сигурно дека токму „Venuum“, но и бројни други тјунери, наскоро ќе понудат различни пакети за преработка.

Нивната цел ќе биде да му дадат на „Luce“ изглед што повеќе ќе се приближи до она што многу купувачи го очекуваат од еден „Ferrari“.

Во „Ferrari“, пак, се надеваат дека јавноста наскоро ќе се навикне на дизајнот, а дека вистинските адути на моделот ќе бидат технологијата, ентериерот и возните карактеристики.