Поранешната технолошка директорка на „OpenAI“, Мира Мурати, изјави пред американски суд дека извршниот директор Сем Алтман ја нарушувал меѓусебната доверба во врвот на компанијата и создавал внатрешни тензии за време на развојот на системите за вештачка интелигенција.
Мурати, која кратко време беше и привремена директорка на компанијата во 2023 година, наведе дека Алтман „создавал хаос“ и им давал различни информации на различни раководители, пренесе „Reuters“.
Сведочењето е дел од судскиот процес што го покрена американскиот претприемач Илон Маск против „OpenAI“, со тврдења дека компанијата преминала од непрофитен кон профитен модел и се оддалечила од своите првични цели.
Во постапката, Маск бара отштета од 150 милијарди долари, со наводи дека средствата треба да бидат насочени кон непрофитниот дел на компанијата, како и кон инвеститорот „Microsoft“.
Мурати пред судот истакна дека постоела сериозна загриженост оти компанијата би можела да се „распадне поради внатрешни конфликти меѓу раководителите“.
Во процесот беше наведено и дека до несогласувања дошло непосредно пред лансирањето на системот „ChatGPT“, кога дел од управата изразил загриженост поради начинот на кој производот бил претставен пред јавноста.
Поранешната членка на управниот одбор на „OpenAI“, Шивон Зилис, која денес работи во компанијата „Neuralink“ на Илон Маск, исто така сведочеше за постоење на несогласувања во рамки на компанијата пред лансирањето на четботот.
Судењето продолжува, а фокусот е ставен на односите меѓу основачите и раководството, како и на прашањето за трансформацијата на компанијата и нејзиниот иден правец на развој.
