Како што рекла, животот во Русија има свои правила, а приспособувањето може да биде сè само не едноставно. Таа предупредува дека таму не треба да се доаѓа со илузии дека сè ќе оди мазно, бидејќи како што тврди тоа не е земја за оние кои очекуваат лесен почеток.

„Животот тука има свои правила и приспособувањето може да биде предизвикувачко, па затоа е важно да се дојде без илузии дека сè ќе оди мазно. Ова не е земја за оние кои очекуваат сè да им биде сервирано на тацна“, истакнала таа.

Борба со бирократијата

Како прва, а можеби и најголема пречка, ја издвоила бирократијата. Рекла дека со неа нема шега и дека токму тоа за многумина е најтешкиот дел од животот во Русија. Решавањето документација, добивањето привремен престој, визи и сè друго што го следи преселувањето, го опишала како долготраен и исцрпувачки процес.

„Немојте да доаѓате очекувајќи дека ќе биде лесно, ќе биде сè само не тоа. Русија на тој начин ќе ве стави на тест и ќе провери дали навистина сте решени да останете. Преживуваат само најупорните“, нагласила таа.

Без јазик нема вистински живот

Втората работа што ја истакнала се однесува на јазикот. Таа смета дека секој кој сака сериозно да се насели во Русија мора да научи руски, бидејќи без тоа, како што рекла, е речиси невозможно да се изгради вистински живот.

Иако познава странци кои таму живеат со години без да го знаат јазикот, смета дека таквиот однос кон земјата во која живеат е донекаде непочитување. „Верувам дека учењето на јазикот е основна должност ако се селите во која било земја. Ако сакате да најдете добра работа, да имате руски пријатели и заедница и навистина да ги искусите и разберете Русите и нивната култура, јазикот е неизбежен“, објаснила таа.

Бескрајно долги зими

Третата работа на која предупредила се долгите и исцрпувачки зими. Таа напоменала дека ситуацијата е нешто поблага на југот од земјата, но дека во повеќето други делови на Русија зимата трае значително подолго отколку што многумина би очекувале.

Како што рекла, не е необично зимските услови да се чувствуваат речиси до крајот на април. „Имајте го тоа предвид при донесувањето на одлуката. Мене ми требаа три години да се навикнам. Пред да дојдам живеев на североистокот на Соединетите Американски Држави, каде што имавме зими, но тоа не е ништо во споредба со Русија“, објаснила таа.

„Не доаѓајте со розови очила“

На крајот порачала дека во Русија, како ни во која било друга земја, не треба да се доаѓа со идеализирана слика за животот.

„Не доаѓајте во Русија, ниту во која било друга земја, со розови очила, мислејќи дека тоа е некаков совршен рај. Не е. Во секоја нова средина ќе мора напорно да работите, да се докажувате и да се навикнувате на нов живот. Тоа е едноставно реалноста на преселувањето“, нагласила Американката.

Таа додала и дека Русија, како ни рускиот менталитет, не е за слаби, но дека на оние кои се подготвени да се приспособат, трудот на крајот може да им се исплати.

Објаснила и зошто не сакала да живее во западна Европа

Американката откри и зошто одлучила да ја напушти Европа и да се пресели во Москва. Рекла дека одлуката не ја донела лесно, бидејќи со години живеела во Белгија и пропатувала голем дел од континентот, поради што, како што тврди, многу добро го познава европскиот начин на живот.

„Четири години живеев во Брисел, во Белгија. Пропатував низ поголемиот дел од Европа и имам пријатели во многу различни европски земји. Ја сакам културата, храната, архитектурата и уметноста. Затоа ми беше особено болно да гледам како Европа буквално ми се урива пред очи“, објаснила таа.

Американката додала дека особено ја погодило она што го гледа како пад на безбедноста и квалитетот на животот во бројни европски градови. „Графити, криминал, ѓубре насекаде, нелегални мигранти. Бев ограбена и едноставно не можев да разберам зошто политичарите дозволуваат Европа да стане ваква“, тврди таа.

Таа исто така нагласила дека сочувствува со Европејците кои, како што рекла, ги гледаат промените во своите држави и имаат чувство дека повеќе не ги препознаваат сопствените земји.

„Жал ми е за Европејците. За оние Европејци кои ги сакаат своите земји, а гледаат како тие им се распаѓаат пред очи поради корумпирани, алчни глобалистички политичари кои немаат никакво чувство за наследството, семејните вредности ниту за што било друго и кои активно го уништуваат сопствениот дом“, рекла таа.

На крајот објаснила дека една од главните причини за нејзиното заминување била потрагата по чувство на сигурност и стабилност. „Како млада жена, сакам да се чувствувам безбедно, сакам да се чувствувам заштитено и сакам да знам дека и моите вредности, мојата култура и мојата вера се исто така заштитени“, заклучила таа.