Додека на сцените се менуваат големи музички ѕвезди, а публиката и познатите личности позираат во впечатливи фестивалски комбинации, зад сјајот се крие и помалку гламурозна страна за која многу поретко се зборува.

Извесна тиктокерка на социјалните мрежи го сподели своето искуство, од валкани тоалети до прескапа храна, откривајќи што навистина можат да очекуваат посетителите на Коачела, особено оние што доаѓаат првпат.

ТикТок совети станаа вирални

Советите на Кетрин Хејс брзо привлекоа внимание на ТикТок. Во видеото таа издвои неколку работи за кои вели дека би сакала да ги знае пред првото одење на фестивалот.

Како прв проблем Хејс ги навела алергиите. „Тревата лета насекаде. Ако имате сезонски алергии, задолжително понесете лекови, капки за очи и бидете подготвени. Јас првиот пат не бев и навистина се мачев“, порачала таа.

Иако Коачела е позната по екстравагантни модни комбинации, таа им советувала на посетителите да не ја жртвуваат удобноста поради изгледот. Истакнала дека телото и стапалата ќе им бидат благодарни, а предупредила и дека навечер треба да се облечат потопло бидејќи температурите во пустината можат значително да паднат.

Храната е скапа, а хигиенските услови често лоши

Според нејзините зборови, храната на фестивалот главно служи како „гориво“, а не како посебно гастрономско искуство. „Ќе има многу штандови и food truck-ови, сè ќе изгледа примамливо и ќе дојдете во искушение да купите некој азиски фјужн бургер со јастог за 40 долари (34 евра). Немојте. Ви ветувам дека нема да биде добар“, рекла.

Советувала и дополнителна претпазливост кога станува збор за хигиената. „Ако во преносен, валкан тоалет видите тоалетна хартија, земете малку повеќе и ставете ја во џеб“, порачала таа, додавајќи дека често ја нема. Препорачала и носење сопствен дезинфициенс за раце, бидејќи фестивалските дозери и пунктови за миење раце, како што тврди, често се празни.

Како да се извлече максимум од фестивалот

Хејс смета дека на фестивалот треба да се дојде порано за да се стигне да се погледнат и помалку познати изведувачи. „Влезете рано, искористете го она за што сте платиле, погледнете повеќе настапи и можеби ќе откриете некој нов изведувач што ќе ви се допадне“, препорачала.

Советувала и сувенирите да се купат уште првиот ден, за да се избегнат големите гужви подоцна во текот на викендот. Препорачала и таблети против болки поради можни главоболки предизвикани од сонцето, заморот и алкохолот.

Нејзините совети наишле на одобрување кај други корисници, кои додале и свои искуства. Еден корисник особено ја истакнал важноста од порано пристигнување и гледање на помали изведувачи, додека други препорачале изнајмување шкафчиња за работи за време на целиот викенд, како и носење марама или бандана поради прашината, за која тврдат дека на Коачела е практично неизбежна.

Ова година многу се зборуваше и за недостатоците на Коачела

Да потсетиме, овогодинешната Коачела се најде под лупа и поради низа поплаки што се проширија на социјалните мрежи и во медиумите. Особено се зборуваше за високите цени на храната и пијалаците.

Така, корисници на интернет споделуваа цени како 15 евра за кафе, 20 евра за бурито и 29 евра за пица, изразувајќи згрозеност од понудата на фестивалот.

Големо внимание привлекоа и објави на посетители кои тврдеа дека им се слошило по пица што се продавала на фестивалот. На социјалните мрежи се појавија бројни поплаки за мачнина и повраќање, но организаторите засега не потврдија официјална инфекција или епидемија поврзана со храната.

Освен храната, многумина се жалеа и на сместувањето. Се појавија извештаи за откажани резервации непосредно пред пристигнувањето, а некои тврдеа и дека изнајмувачите се обиделе нагло да ги зголемат цените пред фестивалот. Airbnb, од своја страна, соопшти дека не бележи поголем пораст на откажувања и ги истакна своите механизми за заштита на гостите.

Во медиумите се појавија и тврдења дека на некои инфлуенсери во последен момент им биле откажани поканите за фестивалот, што дополнително ја поттикна расправата за другата, помалку гламурозна страна на Коачела.