Шок дипломатија: Синот на претседателот на Уганда бара милијарда долари и „најубава Турчинка“ или ќе ги прекине дипломатските односи

Началникот на одбраната на Уганда и син на претседателот на таа земја, Мухузи Кајнеругаба, побара од Турција една милијарда долари и брак со „најубавата жена“ во Турција, тврдејќи дека тоа е надомест за придонесот на Уганда за безбедноста во регионот, притоа заканувајќи се со прекин на дипломатските односи.

Кајнеругаба, во серија објави на социјалната мрежа „X“, порача дека Уганда во рок од 30 дена ќе ги прекине дипломатските односи и ќе ја затвори турската амбасада во Кампала доколку неговите барања не бидат исполнети.

Во објавите тој тврди дека Турција остварува значителна корист од бизнис и инфраструктурни проекти во Сомалија, вклучително и пристаништа и аеродроми во Могадишу, додека Уганда, според него, со години го носи главниот безбедносен товар, пренесува "NDTV".

Кајнеругаба истакна дека Уганда треба да добие милијарда долари како „безбедносна дивиденда“, со порака дека во спротивно ќе ја затвори турската амбасада.

Во истите објави изнесе и контроверзно барање Турција да му ја „предаде најубавата жена во земјата“ за да ја ожени.

Тој предупреди дека односите меѓу Уганда и Турција не треба да се сведат на „игри на социјалните мрежи“, но истовремено најави можност за брз прекин на дипломатските врски.

Кајнеругаба им препорача и на граѓаните на Уганда, од безбедносни причини, да избегнуваат патувања во Турција.

Во своите објави изрази и поддршка за Израел, наведувајќи дека е подготвен да испрати 100.000 угандски војници за заштита на „светата земја“.

Ова не е првпат Кајнеругаба да привлече внимание со необични изјави – во 2022 година понуди, како што самиот наведе, 100 крави за брак со италијанската премиерка Џорџа Мелони.