Цената на преклопниот „iPhone“ веројатно ќе биде повисока од 2.000 долари.
Американската технолошка компанија „Apple“ планира да го претстави својот прв преклопен „iPhone“ во септември, во рамки на стандардниот термин за лансирање нови модели, и покрај претходните шпекулации за можно доцнење.
Според информации на „Bloomberg“, новиот уред би требало да биде претставен заедно со моделите „iPhone 18 Pro“ и „iPhone 18 Pro Max“, а продажбата би можела да започне веќе една недела по премиерата, како што е вообичаена практика на компанијата.
Во медиумите претходно се појавија информации за проблеми при тестирањето на преклопниот „iPhone“, но „Apple“ засега останува на планот новиот уред да го пласира во исто време или кратко по стандардните модели.
Постои можност, поради сложеноста на технологијата и новите материјали, почетната понуда на новиот „iPhone“ да биде ограничена.
Преклопниот „iPhone“ претставува важен дел од стратегијата на „Apple“ за освежување на својата најважна производна линија и зајакнување на конкурентноста во однос на производители како „Samsung“, кои веќе со години нудат слични уреди.
Новиот модел треба да донесе подобрувања во квалитетот на екранот и издржливоста, вклучувајќи помалку видлив преклоп на дисплејот, а неговата цена најверојатно ќе надмине 2.000 долари.
Се очекува и поширок приказ во хоризонтален режим, што би го подобрило искуството при гледање видеосодржини и играње игри, со приспособен „iOS“ интерфејс сличен на таблетите.
Овој модел е дел од поширока тригодишна стратегија за трансформација на линијата „iPhone“, која вклучува нови дизајни и дополнителни варијанти на уреди, како и планирани промени во распоредот на лансирање во наредните години, пренесува „Tanjug“.
