Денеска, мисијата „Артемис 2“ ќе ја испише сторијата на вселенските патувања и ќе стане првата човечка мисија што ќе ја прелета темната страна на Месечината, односно делот од овој сателит на Земјата што е свртен подалеку од нашата планета.
Додека астронаутите ќе минуваат зад Месечината околу 23:47 часот по британско време во понеделник, радио и ласерските сигнали што му овозможуваат на вселенското летало да комуницира со Земјата ќе бидат блокирани од самата Месечина.
Околу 40 минути, четворицата астронаути ќе бидат целосно сами, без начин да контактираат со контролата на мисијата во Хјустон.
Пилотот на мисијата, Виктор Гловер, изјавил за Би-би-си дека се надева дека светот ќе го искористи тоа време за обединување.
„Кога сме зад Месечината, без контакт со никого, да го искористиме тоа како можност. Да се молиме, да се надеваме, да испраќаме добри мисли и чувства за повторно воспоставување контакт со екипажот“, рекол тој пред мисијата.
На Земјата, овој прекин на комуникацијата ќе биде напнат период за оние кои се задолжени да одржуваат контакт со вселенското летало.
На Земјината станица Гунхили во Корнвол, југозападна Англија, огромна антена собира сигнали од капсулата Орион, прецизно ја одредува нејзината позиција во текот на целото патување и ги испраќа тие информации назад до седиштето на НАСА.
„Ова е прв пат да следиме вселенско летало со екипаж. Ќе бидеме малку нервозни кога ќе оди зад Месечината, а потоа ќе бидеме навистина возбудени кога повторно ќе го видиме бидејќи ќе знаеме дека сите се безбедни“, рекол Мет Козби, главен директор за технологија на Гунхили.
Сепак, надежта е дека ваквите прекини во комуникацијата наскоро би можеле да станат минато. Козби истакнал дека ова ќе биде клучно додека НАСА и другите вселенски агенции ширум светот почнуваат да градат база на Месечината и ќе го интензивираат понатамошното истражување.
„За одржливо присуство на Месечината, потребна е целосна комуникација, 24 часа на ден, дури и на нејзината далечна страна, бидејќи и таа ќе сака да биде истражена“, рекол тој.
Програми како „Moonlight“ управувани од Европската вселенска агенција, планираат да лансираат мрежа од сателити околу Месечината за да обезбедат континуирано и сигурно комуникациско покривање во иднина.
За астронаутите од „Артемис 2“, времето без контакт со Земјата ќе им овозможи целосно да го посветат своето внимание на Месечината.
За време на оваа „темнина“, ќе се посветат на набљудување, фотографирање, проучување на геологијата на Месечината и едноставно уживање во нејзината величественост.
Кога ќе ја напуштат сенката на Месечината и сигналот ќе биде повторно воспоставен, светот со олеснување колективно ќе воздивне, а астронаутите кои создаваат историја ќе можат да ги споделат своите неверојатни сцени со сите на Земјата.
