Неодамна се најде и во друштво на светските лидери во Белата куќа, потврдувајќи го својот меѓународен статус.

Минатата недела принцезата Лала Хасна го претставувала Мароко во Вашингтон, каде што Меланија Трамп ја угостила во Белата куќа по повод покренувањето на иницијативата „Fostering the Future Together“. Но зад тоа протоколарно појавување стои долгогодишен ангажман што ги надминува кралските должности.

Најмладата сестра на кралот

Принцезата Лала е родена на 19 ноември 1967 година во кралската палата во Рабат како четврто од петте деца на покојниот крал Хасан II и неговата сопруга Лала Латифа Хаму. Пораснала со двете постари сестри и братот, денешниот крал Мохамед VI, додека семејството подоцна добило уште еден син.

Иако е дел од едно од најпознатите кралски семејства во светот, Хасна уште од почетокот се профилирала како поповлечена членка, фокусирана на конкретна работа, а не на јавен спектакл.

Семејство и приватен живот

На 26 години се омажила за радиологот Халил Бенхарбит. Свадбата во кралската палата во Фес траела дури пет дена и ноќи, како што тогаш известуваа светските медиуми. Парот има две ќерки, Лала Умаима и Лала Улаја.

Нејзиниот клучен јавен ангажман започнал кон крајот на 90-тите години, кога татко ѝ ѝ ја доверил заштитата на мароканскиот брег. Уште тогаш ја покренала програмата „Да ги направиме нашите плажи насмеани“, која подоцна прераснала во националниот проект „Чисти плажи“. „Таа ја покрена програмата што подоцна стана иницијатива Plages Propres“, се наведува во нејзиниот официјален профил.

Во 2007 година била именувана за „Амбасадорка на брегот“ во рамки на евро-медитеранската програма за животна средина со поддршка од Обединетите нации, а веќе една година подоцна станала и амбасадорка на добра волја за климатски иницијативи во сливот на Конго.

Нејзината работа е препознаена и на глобално ниво, па редовно учествува на собирите на Обединетите нации, УНЕСКО и ФАО. Таа го претставувала Мароко и при потпишувањето на Парискиот договор во 2016 година.

Освен заштитата на животната средина, принцезата е силно вклучена и во зачувувањето на културното наследство, како и во проекти поврзани со децата, жените и социјалната грижа. Таа претседава со низа организации и иницијативи кои се занимаваат со намалување на сиромаштијата и заштита на најранливите групи.

Белата куќа

Неодамнешната посета на Вашингтон дополнително ја зацврстила нејзината меѓународна позиција. Како претставничка на Мароко, таа учествувала на дводневен настан што собрал партнери од 38 земји.

Иницијативата „Fostering the Future Together“ е насочена кон зајакнување на младите преку образование и технологија, како и кон јакнење на заштитата на децата во дигиталниот простор.

Интересно е што за време на клучната дискусија Лала седела од левата страна на Меланија Трамп, додека од десната страна била Брижит Макрон, што симболично ја потврдува нејзината сè повидлива улога на светската сцена.