Италијанскиот крајбрежен град во централна Италија, Пезаро, ќе воведе забрана за пушење на плажите од април, а секој што ќе ја прекрши ќе се соочи со казни од 25 до 500 евра.
Новата регулатива важи и за електронските цигари и ќе се применува на сите плажи во тој град на јадранскиот брег.
Пушењето ќе биде дозволено само во баровите на плажа, под услов операторите да одредат посебни места за пушење и да обезбедат доволно пепелници, а казни ќе изрекува локалната полиција на плажата, додека крајбрежната стража е одговорна за спроведување на законот покрај водата и на 200 метри од брегот, пишува „Билд“.
Градот Пезаро објави дека оваа одлука е донесена за заштита на животната средина.
Отпушоците од цигари се направени од целулозен ацетат, пластика на која ѝ се потребни 10 до 15 години за да се распадне, а секој филтер тежи просечно 0,3 грама, а кога се фрла, ослободуваат токсини и микропластика што го загадуваат океанот.
Пезаро не е првиот град во Италија што го забранува пушењето на плажи или јавни плоштади - ова веќе го направија градовите Сироло и Сан Бенедето дел Тронто во истиот регион, додека во градот Бибионе (регион Венето) пушењето е забрането по должината на осум километри од брегот, освен во одредените места за пушење.
Слични прописи постојат во Сардинија, Апулија и Лигурија.
Сепак, во Италија не постои национален закон што забранува пушење на плажи - постои забрана за фрлање отпушоци од цигари во вода или песок, што се казнува со казни до 300 евра.
