Германскиот автомобилски магазин „Auto Bild“ има единствена практика на долгорочни тестови на возила кои траат и до 100.000 километри. Со години имаат собрано богата база на податоци за десетици модели кои минале низ исклучително тешки услови на возење, а издвоени се и оние со најмалку дефекти. Автомобилите се тестираат во сите временски услови – од кратки градски релации до возење по автопат – па резултатите не претставуваат само техничка анализа, туку даваат сеопфатна и доверлива слика за нивната издржливост и квалитет.
Најсигурни автомобили по 100.000 километри
Следните модели оставиле одличен впечаток и добиле највисоки оценки. Не само што покажале висок квалитет и сигурна технологија, туку демонстрирале и минимални слабости во секојдневна употреба и при демонтажа. Така, најдобар по 100.000 км бил „Audi A3 Sportback g-tron“, тестиран во 2017 година. Добил оценка 1+ (во германската скала, најдобра оценка од 1 до најлоша 5). „Audi“ немал ниту една грешка. Следен со оценка 1+ е „BMW M3“, тестиран во 2023 година, со мануелен менувач и карбон-керамички сопирачки, пишува „Revija HAK“.
На третото место е „Audi A4 Avant TFSI ultra“ од 2019 година со оценка 1 (и сите наредни модели исто имаат оценка 1), без поголеми проблеми. Потоа следи „Audi A6 Avant 40 TDI“ (2021), кој освен сензорот за паркирање што постојано активирал предупредувања за грешки, немал дефекти. „BMW Z4 sDrive 30i“ (2021) го завршил тестот на издржливост практично без абење или компликации. Во текот на целиот период не побарал ниту една непланирана посета на сервис. Дури ни демонтажата под строг надзор на „DEKRA“ не открила никакви недостатоци или значително абење.
„Seat Ateca 1.4 EcoTSI Style“ (2020) – по долгорочното возење, неколку возачи се пожалиле на болки во грбот и вкочанетост во задникот. Тоа резултирало со казнен поен, нарушувајќи ги инаку одличните и беспрекорни перформанси. „VW T-Cross 1.0 TSI“ (2023) поминал 100.000 километри без ниту една грешка или дефект.
При финалниот преглед бил забележан светло-кафеав слој на предната и задната оска, кој како безопасна површинска корозија не влијаел врз перформансите на „T-Cross“. Моторот, менувачот, спојката – сè било во беспрекорна работна состојба. „BMW 320 d Touring“ (2022) издржал 100.000 километри со целосна стабилност и леснотија. Неколку функционални слабости во секојдневната употреба, неколку (претежно козметички) проблеми при демонтажа и високата цена – тоа е сè што било забележано.
„Mazda CX-5 Skyactiv-D 184 AWD“ (2021) исто така го поминала тестот без значајни недостатоци и со беспрекорна сервисна поддршка. Почетна, но безопасна корозија била пронајдена под заптивката на багажникот.
Вградениот дизел-мотор од 2,2 литра не покажал знаци на абење по 100.000 километри. „Suzuki Swift Sport 1.4 Boosterjet“ (2021) го завршил тестот без проблеми. Дури при демонтажата бил откриен дефект: (релативно мала) ’рѓа на надолжните носачи. Заштитата од корозија била недоволна. Без овој недостаток, „Swift Sport“ би ја добил највисоката оценка.
