Британската инфлуенсерка Бет Клуг се бори за живот во тајландска болница откако, под сè уште неразјаснети околности, паднала од балконот на четвртиот кат на хотел во Патаја. Несреќата се случила во раните утрински часови на 15 март, а младата жена се здобила со повеќекратни и животозагрозувачки повреди, претворајќи го својот одмор од соништата во вистинска ноќна мора, пишуваат британските медиуми.

Нејзините пријатели во Велика Британија очајно се обидуваат да соберат средства за нејзино лекување и враќање дома, додека тајландската полиција ги истражува сите околности на овој трагичен настан.

„Рацете ѝ се скршени, не може да ги помрдне“

Според изјавите на нејзините пријатели, Бет при падот од висина од четири ката го скршила ’рбетот на дури 24 места. Паднала на бетонска жардиниера и грмушки, што веројатно го ублажило ударот, но истовремено ѝ нанело катастрофални повреди. Рацете ѝ се целосно скршени и не може да ги движи.

Прв ја пронашол хотелски обезбедувач кого го разбудил силен звук. „Слушнав звук како да паднал голем предмет и удрил во грмушките“, изјавил обезбедувачот. „Побрзав да проверам и пронајдов човечко тело кое паднало и повикуваше помош. Веднаш ги известив надлежните.“ Итните служби ја затекнале како лежи во грмушките покрај зграда од 22 ката, плачејќи од неподнослива болка.

Истрагата е во тек, осигурувањето чека извештај

Локалната полиција започнала истрага и во моментов ги прегледува снимките од безбедносните камери за да ја утврди точната причина за падот. Засега не е познато дали несреќната девојка била под дејство на алкохол. Полицискиот извештај е клучен за понатамошните чекори, бидејќи нејзината осигурителна компанија не може да започне со покривање на трошоците за лекување без него.

„Бет има осигурување, но им е потребен полициски извештај пред да почнат со исплата. Британската амбасада се вклучи за да го забрза процесот“, објасни нејзината пријателка Ким Лајал.

Пријателите молат за помош и сочувство

Нејзините пријатели во татковината се скршени и апелираат за помош. „Таа е во големи болки, како што можете да замислите. Воопшто не може да ги движи рацете. Скршени се. Се молиме само што поскоро да ја вратиме дома“, изјави Лајал и упати апел до јавноста: „Таа е сè уште млада девојка, сама во странска болница, врзана за кревет и во болки. Луѓето треба да покажат малку сочувство.“

Пријателката Ана Мохамед, која ја посетила Бет во болницата во Патаја, ја потврди сериозноста на состојбата. „Се обидуваме да собереме средства за да ја вратиме дома. Грбот ѝ е скршен на 24 места, не може да ги користи рацете, има тешки повреди и трпи силни болки.“

Само три недели пред несреќата, Бет на социјалните мрежи објавила насмеана фотографија од британски аеродром со оптимистичен опис: „Сега започнува моето вистинско тајландско искуство.“ Нејзината авантура се одвивала во Патаја, град познат како „Град на гревот“ и туристичка мека која привлекува посетители со барови, евтина забава и бурен ноќен живот, поради што некои Британци го нарекуваат и „порно Disneyland“.