Во емисијата „Doručak na drugom“ на Хрватското радио, денешниот Ден на татковците беше одбележан со повик од слушател кој длабоко ги трогна водителите и бројни слушатели низ целата земја. Во програмата се јави очувот Дамир и ја раскажа својата приказна, предизвикувајќи солзи и силни емоции во студиото, но и надвор од него.
„Поради тоа што сум очув“
Водителите Марко Братош, Дора Срдар и Хрвоје Кечкeш разговараа со слушателот Дамир, кој на прашањето зошто за него овој ден е посебен одговори со треперлив глас: „Поради тоа што сум – очув“. Неговиот одговор веднаш привлече целосно внимание, а потоа следеше приказна што многумина ги остави без зборови.
„Се оженив со жена со три деца и се чувствувам како нивен татко. Извинете што ми трепери гласот, ме совладаа емоциите. Животот ме наведе на тоа да не можам да имам свои деца, па со сопругата добив три деца кои ме засакаа како да сум им вистински татко, бидејќи нивниот биолошки татко не се грижеше за нив. Се трудев да им пружам љубов и сè што им беше потребно, особено на најмалиот, кој бараше најмногу внимание“, раскажа Дамир.
Додаде дека најмалиот син тргнал по неговите професионални стапки. „Јас имав 30 години, а тој 13. Стана возач, како и јас, и сега работиме во иста компанија. Секогаш се трудевме да бидеме заедно. Пред две години добив и внука. Не можам да ви ја опишам таа среќа кога ме гледа“, рече гордо.
Својата приказна ја заврши со порака полна со надеж. „Сметав дека денес морам да се јавам. Се надевам дека синот ме слуша, баш денес сме на ист терен, и дека ќе се сети да ми го честита Денот на татковците“, рече Дамир.
„Вие сте вистински татко“
Неговите зборови предизвикаа силна реакција во студиото, а водителката Дора Срдар, која беше трогната до солзи, му порача дека тој навистина е вистински татко. „Ова е вистински ден за вас. Предизвикавте силни емоции кај мене. Татковците често ги опишуваме како силни и цврсти мажи, но мислам дека вистинската сила е токму во тоа да можат да покажат чувства, да пуштат солза. Вие сте вистински татко на својот син и верувам дека е среќен што ве има“, рече таа.
Емисијата одекна и на социјалните мрежи, каде бројни слушатели ги споделија своите впечатоци. „Луѓе мои, плачам со вас утрово од 6:30. Мојот татко не е со нас веќе две години, но е вечна сила во моето срце. Среќен Ден на татковците на сите татковци и очуви!“, напиша една слушателка.
„Плачев во автомобилот на пат кон работа слушајќи ја оваа животна приказна на човек со благородно срце. Секоја чест. Не е татко оној што е биолошки, туку оној што дава љубов“, се согласи друга.
