„Се збогуваме со ’Sora‘. На сите кои создаваа со ’Sora‘, споделуваа содржина и градеа заедница околу неа: ви благодариме. Она што го создадовте со ’Sora‘ е важно и знаеме дека оваа вест е разочарувачка. Наскоро ќе споделиме повеќе информации, вклучувајќи временска рамка за апликацијата и API, како и детали за зачувување на вашите дела“, се наведува во соопштението на тимот на „Sora“, без дополнителни објаснувања.

Оваа најава доаѓа само три месеци откако компанијата „Disney“ склучи тригодишен договор со „OpenAI“, според кој „Sora“ требаше да генерира видеосодржини по барање на корисниците, користејќи повеќе од 200 маскирани, анимирани или фантастични ликови од „Disney“, „Marvel“, „Pixar“ и „Star wars“. „Sora“ и „ChatGPT Images“ требаше да креираат „fan-inspired“ видеа со лиценцирани ликови на „Disney“ на почетокот на 2026 година, додека „Disney+“ требаше да додава специјални селекции на видеа генерирани со помош на „Sora“.

„Disney“ сега го прекина партнерството со „OpenAI“, кое вклучуваше планови медиумскиот гигант да инвестира една милијарда долари во компанијата за вештачка интелигенција предводена од директорот Сем Алтман.

Претставник на „Disney“ во изјава за „Variety“ рече: „Како што областа на вештачката интелигенција брзо се развива, ја почитуваме одлуката на ’OpenAI‘ да излезе од бизнисот со генерирање видеа и да ги пренасочи своите приоритети. Ја цениме конструктивната соработка на нашите тимови и она што го научивме од неа, и ќе продолжиме да се занимаваме со AI платформи за да најдеме нови начини да допреме до фановите таму каде што се, со одговорно прифаќање на новите технологии што ја почитуваат интелектуалната сопственост и правата на креаторите“.

Ни „ChatGPT“ повеќе нема да генерира видеосодржини врз основа на текст

Втората итерација на „Sora“ од „OpenAI“, лансирана кон крајот на септември 2025 година, генерираше исклучително реалистични видеа и предизвика загриженост во Холивуд, особено поради моделот „Sora 2“, според кој носителите на права мора активно да сигнализираат дека сакаат нивните заштитени дела да бидат исклучени од системот. Во ноември, јапонската група за заштита на содржина „CODA“, чии членови ја вклучуваат анимациската куќа „Studio ghibli“, испрати писмо до „OpenAI“ со барање компанијата да престане да го користи нивниот материјал за тренирање на „Sora 2“.

„OpenAI“ обезбеди преглед на „Sora“, која користи модел за генерирање видеа од текст, во февруари 2024 година, пред во декември истата година да биде објавена првата јавно достапна верзија. Самостојната апликација „Sora“ беше лансирана во септември 2025 година. Со нејзиното гасење, „ChatGPT“ исто така повеќе нема да генерира видеосодржини по текстуални барања.

Другите генеративни AI видео платформи ќе продолжат да функционираат, иако некои од нив беа обвинети од „Disney“ и други холивудски студија за кршење авторски права.

Непосредно пред да го објави договорот со „OpenAI“, „Disney“ му испрати административна забрана на „Google“, тврдејќи дека технолошкиот гигант крши авторски права „во огромен обем“ користејќи AI модели и сервиси за „комерцијално експлоатирање и дистрибуција“ на слики и видеа. („Google“ подоцна ги отстрани AI-генерираните видеа под интелектуална сопственост на кои „Disney“ му укажа.)

Претходно, студиото упатуваше слични барања и до „Meta“ и „Character.ai“, како и поднесуваше тужби заедно со „NBCUniversal“ и „Warner bros. discovery“ против AI компаниите „Midjourney“ и „Minimax“, обвинувајќи ги за кршење авторски права.

Во поново време, кинескиот „Bytedance“ се соочи со низа правни закани од студија како „Disney“, „Paramount“, „Warner bros.“, „Sony“ и „Netflix“ поради својот AI систем „Seedance 2.0“. Како одговор, „Bytedance“ најави дополнителни мерки за заштита „додека работиме на спречување на неовластена употреба на интелектуалната сопственост и личните прикази од страна на корисниците“.