Редовната физичка активност е еден од најефикасните начини за продолжување на животот и подобрување на неговиот квалитет. Истражување по истражување покажува дека физичката активност е поврзана со помал ризик од рак, депресија, деменција, дијабетес тип 2 и кардиоваскуларни заболувања.

Здравствените препораки советуваат најмалку 150 минути аеробна активност со умерен интензитет неделно, а тренингот за сила се препорачува најмалку двапати неделно. Дури и четири до пет минути интензивна физичка активност дневно (трчање по автобус, носење торби по скали и слично) може да придонесе за подолг живот, пишува „N1 Slovenija“.

Иако останувањето активен е клучно за здравјето, занимавањето со спорт додава и социјална димензија на тренингот. Истражувањата покажуваат дека некои спортови повеќе ја поддржуваат долговечноста од други, пишува „New York Times“.

Рекет и топчиња се вистинскиот избор

Данска студија открила дека тенисерите живеат речиси 10 години подолго од своите врсници кои не се доволно активни, и подолго од фудбалери, пливачи и други рекреативци опфатени во анализата. Друга студија од Велика Британија и САД ги следела испитаниците околу една деценија и утврдила дека спортовите со рекет се поврзани со помал ризик од смрт во споредба со другите форми на вежбање.

Наодите не докажуваат дека тенисот директно го продолжува животот, вели Емануел Стаматакис, епидемиолог од Универзитетот во Сиднеј и главен автор на британската студија. Истражувањата не се дизајнирани да утврдат зошто одреден спорт е особено корисен. На пример, можно е луѓето кои играат спортови со рекет да имаат повисок социо-економски статус и со тоа подобро здравје.

Сепак, експертите сметаат дека уникатната комбинација од физички, когнитивни и социјални предизвици во тенисот придонесува за здраво стареење.

Најпрво, тенисот нуди тренинг за целото тело. Играта бара и брзи промени на насоката, што може да помогне во подобрување на рамнотежата и намалување на ризикот од падови, објаснува Стивен Мур, метаболички епидемиолог во Националниот институт за рак.

Истражувањата покажуваат дека редовното играње може да ја подобри густината на коските и да го зајакне телото против фрактури. Тенисот исто така комбинира интензивни налети на движење со кратки периоди на одмор, структура која наликува на интервален тренинг и може да ја подобри физичката кондиција.

Освен физичкиот напор, спортот е и когнитивно изискувачки и социјален, два фактори кои се клучни за долговечноста, изјави за „NYT“ Марк Ковач, спортски научник кој работел со врвни тенисери.

Што е со другите спортови?

Иако тенисот се издвојува, и други рекреативни спортови се поврзани со подолг живот. Во студија спроведена на речиси 300.000 постари Американци, велосипедизмот бил поврзан со 3 проценти понизок ризик од смрт во период од 12 години, пливањето со 5 проценти, а голфот со 7 проценти понизок ризик, објаснува д-р Мур.

Додека велосипедизмот главно го активира долниот дел од телото, пливањето претставува тренинг за целото тело. Голфот, од друга страна, вклучува лесна аеробна активност, но бара и сила во колковите, рамнотежа и фина моторичка контрола.

Најважно е, нагласува д-р Мур, да пронајдете спорт во кој уживате и да останете активни.