Париз се подготвува за враќањето на една од своите уникатни атракции. По значителниот успех и 24.000 посетители за време на кратката презентација минатата година, Ајфеловата кула повторно ги отвори своите врати на 17 март 2026 година за „Le Vertige de la Tour“ (Вртоглавица на кулата).

Станува збор за висечки мост што на посетителите им нуди можност да го преминат на висина од 60 метри, нудејќи исклучителен поглед на градот.

Оваа привремена инсталација, отворена до 3 мај е наменета за посетители кои сакаат да го доживеат Париз од нова перспектива на највисокиот градски висечки мост во Франција.

Панорамски поглед

Атракцијата овозможува прошетка по мрежеста патека долга 40 метри, која се протега помеѓу источните и западните столбови на Ајфеловата кула. На висина од речиси 60 метри, со Париз под нив, посетителите добиваат уникатно искуство на висина и отворен простор.

„Le Vertige de la Tour“ е конструкција дизајнирана и изградена од специјализираната компанија „Arboricorde“. Иако искуството може да изгледа предизвикувачки, атракцијата е целосно безбедна.

Мостот е опкружен со двоен слој од испреплетена мрежа која се состои од повеќе од 25.000 јазли и има носивост од повеќе од 30.000 килограми на квадратен метар.

Поставена е дополнителна заштитна мрежа за да се спречи паѓање на какви било предмети, што им овозможува на посетителите да уживаат во погледот на градот и структурата на кулата без пречки.

Услови за пристап

Пристапот до оваа атракција, сместена на првиот кат од кулата е бесплатен за сите посетители кои имаат важечка влезница за Ајфеловата кула.

За да се избегнат толпи и да се обезбеди непречен проток, потребна е регистрација на самото место со скенирање на QR-кодот што се наоѓа во близина на самата инсталација и во павилјонот Ферие.

Потоа посетителите избираат бесплатен термин, кој се нуди на секои 15 минути и можат да регистрираат група од најмногу осум лица.

Важно е да се спомене дека максимум четири лица можат да бидат на мостот истовремено со цел да се одржат безбедносните стандарди. Искуството е наменето за широка публика, вклучувајќи деца постари од три години, меѓутоа лицата под 12 години мора да бидат придружени од возрасни.

Поради специфичната конфигурација и пристапот преку скали, атракцијата не е достапна за лица со намалена подвижност. Исто така од безбедносни причини не е дозволено да се носат детски колички, куфер, храна и пијалаци на мостот, а на посетителите им се препорачува да избегнуваат високи потпетици.

По преминувањето на мостот, посетителите можат да се одморат на соодветно уредената пролетна тераса која се наоѓа веднаш до атракцијата. Овој простор нуди место за релаксација со пијалак или десерт, со панорамски поглед на Париз.

Терасата дава пријатен контраст на возбудата што ја нуди „Вртоглавица на кулата“ и овозможува уживање во убавината на градот на помирен начин.