Бидејќи таквите информации можат да се појават на интернет и во пребарувачите, тие можат да ја загрозат приватноста и безбедноста на поединците. За да помогне во решавањето на овој проблем, „Google“ разви бесплатна алатка наречена „Results about you“. Таа им овозможува на корисниците да побараат од „Google“ да ги отстрани резултатите од пребарување што го откриваат нивниот телефонски број, адреса или е-пошта.

Откако ќе се активира, алатката може да испраќа и известувања секогаш кога „Google“ во резултатите од пребарување ќе пронајде ваши лични податоци. Корисникот потоа може да ја прегледа страницата и, доколку е потребно, да побара отстранување. Во некои случаи, алатката може да означи и многу чувствителни податоци како броеви на пасоши или лични карти.

Што всушност прави алатката

Важно е да се напомене дека алатката не ги брише вашите податоци од интернет, туку само ја отстранува врската од резултатите на „Google“. Тоа значи дека информациите и понатаму можат да постојат на оригиналната веб-страница, но нивното отстранување од „Google“ значително го отежнува нивното пронаоѓање за повеќето луѓе.

„Ако некој е многу решен да ве пронајде, ќе ве пронајде“, изјави за „BBC“ Торин Клосовски, активист за безбедност и приватност од организацијата „Electronic Frontier Foundation“ („EFF“). „Но „Google“ е толку присутен и лесен за користење што е прилично корисно да се ослободите од најочигледните и најлошите работи. Така го отстранувате оној прв, лесно достапен слој на информации.“

Како да ја користите алатката

За користење на алатката потребно е да ја посетите страницата „Results about you“ преку интернет-прелистувач или преку апликацијата „Google“. Таму треба да го внесете вашето име и други лични податоци што сакате „Google“ да ги пребарува, како прекари, презимиња, телефонски броеви, домашни адреси и е-пошта.

Се препорачува да ги вклучите известувањата за да добивате предупредувања ако „Google“ ги пронајде вашите лични податоци во нови резултати од пребарување. Известувањата може да се испраќаат преку е-пошта или преку апликацијата „Google“.

Пронајдените резултати се прикажуваат на картичката „For review“ на страницата на алатката. Таму можете да проверите кои веб-страници содржат ваши лични податоци, а со кликнување на одреден резултат добивате повеќе информации за страницата и податоците што се прикажани на неа.

Ако сакате да отстраните некој резултат, потребно е да го изберете и да кликнете на опцијата „Request removal“. „Google“ ќе го прегледа барањето и ќе ве извести за исходот преку е-пошта. Треба да се има предвид дека врските до страници од јавен интерес, како владини портали или новинарски сајтови, можеби нема да можат да бидат отстранети.