Бекер не бега од фактот дека бил неверен и дека прељубата на крајот довела до развод, но во поткастот на Луис Теру вели дека деталите со текот на годините се искривиле и дека „тој“ момент не бил таков каков што често се прераскажува.

„Ја изневерив, во тоа нема сомнеж“

Бројни извештаи со години тврдеа дека прељубата се случила во еден лондонски бар додека Барбара го раѓала нивниот син Елиас. Меѓутоа, Бекер сега тврди дека тоа не е точно. „Не беше во породилни болки“, рече тој. „Беше во болница, но породилните болки не започнаа. Не“.

Во разговорот детално опиша како тој и Барбара продолжиле да функционираат како родители и како течел нивниот развод. „Продолживме понатаму, се договоривме околу разводот. Ја изневерив, во тоа нема сомнеж. Успеавме да изградиме однос заснован на почит. Таа е прекрасна мајка на моите двајца постари синови. Всушност, и таа оваа година се пресели во Милано“, раскажа Бекер.

„Така го пребродивме тоа. Имаше неколку сцени по нашиот развод. Повторно, тоа беше толку одамна. Навистина морам да се потрудам да се присетам што се случило, а што не било баш убаво од нејзина страна“, додаде тој. „Да не навлегувам премногу во детали, таа имаше моќ бидејќи јас бев негативецот. Доби убав чек. Доби и убава месечна поддршка. И сфати дека никој не е совршен“.

Бекер нагласи дека и покрај сè останал посветен татко. „Сакам за себе да кажам дека сум добар татко. Навистина се грижев за моите двајца најстари синови, иако тогаш не живееја во Европа, туку се преселија во Мајами. Така што, 25 години подоцна навистина се сметаме за блиско семејство, без оглед на тоа што се случило“, заклучи тој.

За познанството со Диди

Бекер во поткастот зборуваше и за други теми, вклучително и за неодамнешниот престој во затвор, како и за познанството со раперот Диди, кој отслужува четиригодишна казна откако во јули минатата година беше прогласен за виновен за организирање проституција. Бекер откри дека бил на некои негови забави и дека обвинувањата не го изненадиле.

„Го запознав. Поминав многу време во Мајами“, рече тој. „Ако го познавате Диди, ако живеете во Мајами и ако ве поканат на забави за викенд, имате избор да кажете да или не“.

„Никој навистина не зборуваше детално за тоа што се случувало, траело со часови. Самите создадете мислење... Забавите беа забави. Но, дури и тие забави понекогаш траеја ден или два“, објасни тој. „Кога разговарате со некого во сабота попладне и повторно во вторник, а тој ви вели: ‘Човеку, дури сега се извлеков’... секако, никој никогаш не кажува што правел во тие 48 часа. Но, мислите ли дека еспресо или Red Bull се доволно силни за да преживеете две ноќи? Никогаш не сум бил тип за долги забави бидејќи, знаете, која е поентата?“.

Живот по затворот

По излегувањето од затвор, каде што помина осум месеци од 30-месечната казна поради прикривање имот и избегнување плаќање долгови, Бекер тврди дека е нов човек. По ослободувањето беше депортиран во Германија, а денес живее во Милано со сопругата Лилијан де Карваљо Монтеиро и нивната ќерка Зое Виторија, родена во ноември минатата година.

„Лесно е од дистанца да кажам дека сега сум благодарен за тоа бидејќи едноставно го запре стариот живот и добив шанса за нов“, рече тој. „Во тоа време беше пекол. А кога влегов внатре, не знаев дека ќе излезам по осум месеци и пет дена. Мислев дека морам да бидам таму најмалку 15 месеци, а потоа можеби и во домашен притвор“.

„Сето тоа се случи додека бев внатре. Излегов порано отколку што очекував. Депортацијата во Германија не беше во план, бидејќи се обидував да го продолжам животот во Обединетото Кралство. Но, за да можам да го направам тоа, ќе требаше да останам подолго во затвор, што не го сакав“, појасни тој. „Последица на депортацијата е што во моментов не можам да се вратам во Обединетото Кралство, но работам на тоа со властите. Се надевам дека тоа наскоро ќе се случи. На слобода сум речиси три години. И го прифаќам тоа“.

Татко на пет деца

Борис Бекер е татко на пет деца од неколку врски и бракови. Со поранешната сопруга Барбара Фелтус, со која беше во брак од 1993 до 2001 година, доби двајца синови – Ноа (1994) и Елиас (1999). Ќерката Ана (2000) ја доби со Русинката Ангела Ермакова, со која имаше кратка врска. Од бракот со Шарлели „Лили“ Керсенберг, кој траеше од 2009 до 2018 година, има син Амадеус (2010).

Најмладото дете, ќерката Зое Виторија (2025), Бекер го доби со сегашната сопруга Лилијан де Карваљо Монтеиро, со која денес живее во Милано.