Во Европа најзастапени се два типа автоматски менувачи: класичен автоматик со претворач на вртежен момент и менувач со двојна спојка.

Менувачот со двојна спојка има две механички спојки, за парни и непарни степени на пренос, со цел менувањето брзини да се одвива без прекин во испораката на силата. Оваа технологија кај „Volkswagen“ се означува како „DSG“, кај „Porsche“ како „PDK“, компанијата „Audi“ ја означува како „S tronic“, додека „Hyundai“ и „Kia“ ја користат ознаката „DCT“, пренесува „Fenix-magazin“.

Неправилната употреба го уништува менувачот

Автоматскиот менувач со двојна спојка е ефикасен и спортски ориентиран, но неправилното ракување при возење значително го забрзува трошењето на спојките, предупредуваат експертите.

Слабо држење на сопирачката при стоење

Доколку при чекање зелено светло на семафор ја притискате сопирачката само благо, спојката може постојано да пролизгува, да се загрева и непотребно да се троши.

Експертите советуваат сопирачката да ја притиснете цврсто, а при подолго чекање менувачот да го префрлите во неутрална позиција. Доколку возилото има функција „auto-hold“, користете ја.

Бавно движење во колона

Ако во колона се движите сантиметар по сантиметар, спојката дополнително се оптоварува при секое кратко запирање. Најдобро е целосно да застанете, па потоа да тргнете со еден потег.

Менување насока додека возилото уште се движи

Пребрзото префрлање од рикверц во движење напред додека автомобилот сè уште не застанал создава големо механичко оптоварување. Правилото е прво целосно да застанете, па дури потоа да ја смените насоката на движење.

Тргнување веднаш по стартување на моторот

На менувачот му се потребни неколку секунди за воспоставување притисок на маслото, особено при ладно стартување, па се препорачува возачот да почека кратко пред да вклучи брзина.

Постојано возење во рачен режим

Ако постојано рачно менувате брзини при високи вртежи, спојките дополнително ќе се трошат. Рачниот режим користете го повремено, на пример при претекнување или спортско возење, додека за секојдневна употреба побезбеден е автоматскиот режим.

Нередовна замена на масло во менувачот

Редовната замена на масло е клучна за долг работен век. Производителите најчесто препорачуваат интервал меѓу 60.000 и 120.000 километри. Замена на масло чини неколку стотици евра, но ако се прескокне, поправката на менувач со двојна спојка може да достигне и неколку илјади евра.