Ако имате димена сланина, јајца и грашок од замрзнувач, веќе сте решиле половина од проблемот, а вака подготвената фритата е збогатена со интензивниот вкус на повеќе видови сирење … и едноставно е неодолива. Потребни се само неколку чекори и кратко печење во рерна за да добиете јадење што освојува на првиот залак, а може да се јаде во кое било време од денот.

Состојки:

8 парчиња димена сланина

1 црвена пиперка

3 млади кромитчиња

150 г замрзнат грашок

една дланка босилек

околу 120 г козјо сирење

8 јајца

3 – 4 лажици рендан пармезан

сол и свежо мелен црн пипер

Подготовка:

Вклучете ја рерната да се загрева на 180 степени.

Загрејте малку масло во тава, па пропржете ја ситно сечканата сланина 2 – 3 минути на средна температура.

Додадете ситно сечкана црвена пиперка и пржете уште неколку минути, додека сланината да стане крцкава.

Потоа додадете ситно сечкан млад кромид и динстајте уште околу пет минути, додека сè да омекне.

Измешајте го грашокот и гответе додека да се загрее, па посипете со ситно сечкан босилек и додајте половина од подготвеното козјо сирење.

Изматете ги јајцата, прелијте ги врз смесата, па додајте рендан пармезан и зачинете со сол и пипер.

Кога ќе почне да се стега на дното, изрендајте го преостанатото козјо сирење одозгора и по желба додадете уште малку пипер.

Потоа ставете ја тавата во рерна и печете околу 4 – 5 минути.

Исечете ја фритатата на парчиња пред сервирање.