Британската атлетска ѕвезда Кили Хоџкинсон во четврток ќе нападне светски рекорд на 800 метри.
Нејзина цел е да го собори времето од 1:55.82 што Словенката Јоланда Чеплак го постави на 3 март 2002 година — токму на денот кога се родила 23-годишната Хоџкинсон, што Англичанката го доживува како судбина.
Откако 2025 година ѝ беше обележана со повреди, Хоџкинсон усвои нов, поопуштен пристап кој ѝ овозможува повеќе време за одмор и забава. Тврди дека дружењето со Ким Кардашијан на Париската недела на модата ѝ дало чувство на слобода и дополнително ја подготвило да тргне во рушење на светскиот рекорд.
„Рамнотежата навистина ми е важна, тоа дефинитивно е мојата филозофија. Мојата внатрешна среќа е пред сè друго. Затоа, кога тренерот ми рече дека можам да одам во Париз да ја запознаам Ким Кардашијан, воопшто не помислив да одбијам. Одлично си поминавме, беше многу забавно“, вели таа.
„Колку сум посреќна надвор од патеката, толку таа енергија ја пренесувам и на неа. Тогаш едноставно сум многу подобра на тренинзи и трки. Повеќе се радувам на сè. Мислам дека постигнувањето на таа рамнотежа очигледно е клучно“, додаде таа.
Дека мисли сериозно, покажа минатиот викенд на првенството на Обединетото Кралство во Бирмингем, каде го подобри сопствениот британски рекорд со време 1:56.33. Со тоа се проби на третото место меѓу најбрзите на сите времиња, а сега на нишан ѝ е само Чеплак, која своевремено беше осудена за допинг.
Нејзиниот тренер Тревор Пејнтер смета дека шансите на Кили за соборување на рекордот се многу високи, „освен ако не се разболи или не падне“.
