Ентузијасти на „Apple“ издвоија повеќе од 5 милиони долари за два исклучително ретки предмети од раната историја на компанијата – потпишан чек и прототип на матична плоча.
Првиот чек од оригиналната банкарска сметка на „Apple“, потпишан од коосновачите Стив Џобс и Стив Вознијак, беше продаден на аукција во САД за неверојатни 2.409.886 долари, односно 2.032.980 евра.
Набрзо потоа, на истата аукција беше продаден и финалниот прототип на матична плоча пред првата сериска продукција, и тоа за 2.750.000 долари или 2.319.900 евра.
Интересно е што и двата предмета пред аукцијата имаа проценета вредност од само 500.000 долари.
Чекот од 500 долари, издаден од банката „Wells Fargo“ и означен со број „No. 1“, влезе во историјата како најскапиот потпишан чек некогаш продаден на јавна аукција.
Чекот беше издаден на име Хауард Кантин, дизајнер на печатени плочи кој шемата „Apple-1“ на Стив Вознијак ја претворил во функционален хардвер, а лично го потпишале Џобс и Вознијак.
Датиран на 16 март 1976 година, чекот е издаден повеќе од две недели пред „Apple“ официјално да биде регистрирана како компанија, веднаш откако основачите ја отвориле првата банкарска сметка. И чекот и прототипот на матичната плоча ги продаде американската аукциска куќа „RR Auction“.
