Сè повеќе видеа на социјалните мрежи изгледаат како да се снимени со паметни очила, а дел од луѓето тврдат дека биле снимани без знаење и согласност. Поради тоа повторно се отвора прашањето за приватноста, особено во ситуации кога камерата не е очигледна како кај мобилниот телефон.
Во последните недели социјалните мрежи се преполни со кратки видеа снимени од перспектива на лице кое носи очила со камера, а дел од ваквите објави предизвикуваат непријатност бидејќи изгледаат како тајно снимање во јавност. Токму тоа се истакнува и во бројни текстови за растечката популарност на „паметните очила“ и ширењето содржини што се снимаат „од рака“, без другата страна веднаш да биде свесна дека камерата е вклучена.
Проблемот е што ваквите уреди изгледаат како обични очила, па луѓето во разговор често не обрнуваат внимание дали се снима или не. Кај некои модели постои светлосен индикатор што сигнализира снимање, но тој може да биде мал и лесно да се пропушти, особено на дневна светлина или во турканица. Дополнителен ризик е што дел од видеата се објавуваат без замаглување на лица, имиња, регистарски таблички или локации, па приватните информации можат брзо да се шират и да доведат до вознемирување и „доксинг“, односно откривање лични податоци на интернет.
Дополнителен слој на приказната е „AI“. Снимката од очилата не е само видео, туку и потенцијален влез за алатки што можат да препознаат лице, да поврзат профил, да извлечат име, професија или профили на социјалните мрежи, барем теоретски. Затоа сè почесто се зборува дека „камера на лице“ ги менува правилата на игра, бидејќи го елиминира моментот кога ќе извадите телефон и на сите им станува јасно што правите.
Кај нас, слично како и во други делови од светот, снимањето и објавувањето туѓ лик и глас е чувствително прашање, особено ако станува збор за содржина што може да понижи, вознемири или да нанесе штета, а дополнително е проблематично ако е снимано тајно и со намера. Во пракса, дури и кога снимањето во јавен простор е „сива зона“, објавувањето со идентификациски детали многу брзо станува проблем и за платформите и за лицето што објавува.
Ако сакате барем делумно да се заштитите, за жал нема многу што може да се направи, освен ако забележите дека некој носи такви очила и разговорот се одвива во ваша насока, отворено да прашате дали се снима. Ако забележите објава во која сте препознатливи, веднаш пријавете ја содржината на платформата и побарајте нејзино отстранување, а по потреба зачувајте докази пред бришењето. Оваа тема ќе станува сè поактуелна како ваквите уреди стануваат поевтини и сè повеќе луѓе ги доживуваат како „нормален“ гаџет, а не како камера.
