Италијанската манекенка, која за ревијата ја одбрал дизајнерот Метју Блејзи, се огласила од својот винтиџ бутик „La Garçonne“, сместен на неколку часа северно од Њујорк, каде што живее со сопругот, италијански тату-мајстор и семејството.

Со насмевка и симпатичен нагласок во гласот, во разговор за „Vogue“ ги открила своите корени.

„Се слуша ли дека сум од Рим?“, прашала низ смеа, објаснувајќи дека е родена во Остија, од татко Италијанец и мајка од Гваделуп. Во Соединетите Американски Држави се преселила на 26 години, каде што работела како манекенка сè до 38. година, кога решила да застане.

„Бев во години кога се чувствував премногу стара за работата како манекенка, а премногу млада за да припаѓам во категоријата ’зрели модели‘, како што тоа денес се нарекува“, се присетила таа.

Се посветила на потрагата по винтиџ облека и антиквитети — период што бил пресуден за нејзиниот личен раст.

„Мислам дека во тој момент ми беше потребно да застанам. Да бидеш манекенка во деведесеттите и во двеилјадитите беше прекрасно, но и исцрпувачки. Во тој свет системот лесно те проголтува. Сите имаа мислење за тоа како треба да изгледам и која треба да бидам. Почнав на 22 или 23 години, а веќе ми советуваа да зборувам дека имам 18, бидејќи тогаш веќе бев престара“.

По повлекувањето од светот на модата, Стефани решила повторно да ја преземе контролата над сопствениот имиџ — ја избричила главата и се посветила на личниот развој.

Враќање на пистата за Шанел

Пресвртната точка се случила во 2020 година, кога наполнила четириесет. Фотографот Бил Вестморленд ѝ предложил да се обрати до агенцијата „Iconic Focus“, специјализирана за модели постари од 40 или 50 години. Така повторно се вратила во модниот свет.

„Таа долга пауза ми беше клучна за да сфатам како денес, на 50 години, можам да бидам модел со сопствен идентитет и своја приказна. Не морам никому да му угодувам ниту да се вклопувам во туѓи претстави — можам да бидам автентична и своја“, истакнала таа.

Возрасна разновидност и позитивна слика за телото

Стефани особено го цени периодот во кој се случила оваа промена.

„По ревијата, кога видов колку медиуми се осврнаа на возрасната разновидност на пистата на Шанел, сфатив колку тоа беше силно, прекрасно и важно – што една голема модна куќа дозволи високата мода да ја носат жени од различни возрасти. Убаво е да се види промена во менталитетот, прифаќање на автентичноста. Тоа е еволуција што се движи побрзо или побавно, но постои и се чувствува“, нагласила Стефани.

Со колешките на свои години често коментира дека токму сега е најдобро време да имаш 50 години и да бидеш модел. Сепак, свесна е дека возрасната инклузивност и телесната разновидност сè уште се променливи трендови.

„Тоа се работи што доаѓаат и си одат. Денес се присутни, утре можеби нема да бидат. Но можат и повторно да се вратат. Понекогаш одиш еден чекор напред, па три назад. Сепак, верувам во иднината, затоа што гледам дека постои интерес и важно е да продолжиме да зборуваме за тоа“, додала таа.

Убавината во едноставноста

Голем дел од нејзината препознатливост, секако, ја прави и сјајната побелена коса.

„Одлучив да престанам да ја бојадисувам за време на пандемијата. Почувствував дека тоа е вистинскиот момент за таа промена. И мило ми е, бидејќи косата целосно ми се обнови. Никогаш не била поздрава и поубава“, истакнала Стефани.