Актерката носела реплика на нараквица изработена од косата на славната писателка Емили Бронте, а овој несекојдневен моден детал го искомбинирала со проѕирен корсет-фустан.

Повторно воодушеви

По низа смели „историски“ стајлинзи за време на промотивната турнеја, Роби и овојпат успеа да ги надмине очекувањата. Актерката, која во новата адаптација ја толкува Кетрин Ерншо, за лондонската премиера одбра смел проѕирен фустан од лондонската дизајнерка Дилара Финдикоглу. Креацијата беше изградена околу корсет во викторијански стил, а дополнително внимание привлече поради зелените детали изработени од – исплетена коса.

Роби откри и дека носела реплика на нараквицата на Шарлот Бронте, за која се верува дека била изработена од косата на нејзините сестри, Емили и Ен. Токму тоа парче накит послужило како инспирација за необичните елементи на фустанот, со што целиот стајлинг добил дополнителна симболика поврзана со наследството на славното книжевно семејство.

Актерката и претходно покажала дека ја следи работата на Финдикоглу – нејзини креации носела и за време на промоцијата на филмот „Барби“ во 2023 година, кога нејзините модни избори редовно ги полнеа насловните страници.

Хемија за која сите зборуваат

Покрај модата, на премиерата се коментираше и она што публиката веќе со недели го забележува за време на промотивната турнеја – хемијата меѓу Маргот Роби и Џејкоб Елорди. Нивниот близок, опуштен однос пред камерите предизвика бројни реакции на социјалните мрежи, а дел од обожавателите почнаа да нагаѓаат дали актерскиот пар користи „ПР прирачник“.

Некои дури ги споредија со промотивната стратегија што во 2023 година ја имаа Сидни Свини и Глен Пауел за филмот „Само не ти“, кога гласините за „романса“ беа дел од медиумскиот шум околу филмот.

„Меѓусебна опсесија“ за време на снимањето

Дополнително внимание неодамна привлече и самиот Елорди, кој во едно интервју изјави дека тој и Роби за време на снимањето развиле „меѓусебна опсесија“. Во разговор за „Fandango“, додека Роби седела покрај него, рече дека на сетот се трудел никогаш да не биде оддалечен повеќе од десетина метри од неа.

„Ако имате можност да бидете на сет со Марго Роби, ќе се потрудите секогаш да бидете на пет до десет метри од неа“, изјави тој. „Ја гледате како пие чај, како јаде. Се прашувате кога ќе пукне? Но таа никогаш не пука.“

Елорди на лондонската премиера се појави во елегантен темнозелен костум, а фотографите забележаа и еден „џентлменски“ момент: ја заштити Роби од дождот додека таа позираше пред фотографите.