Актерот Кристијан Бејл неодамна откри дека поминувал шест часа на ден во собата за шминкање за да се трансформира во чудовиштето на Франкенштајн за филмот „The Bride!“ во режија на Меги Гиленхал.
Станува збор за нова верзија на филмот „Bride of Frankenstein“ од 1935 година. Заедно со Бејл, во филмот глуми и Џеси Бакли, која беше номинирана за Оскар за нејзината улога во филмот „Hamnet“. Бакли, според истиот извор, поминала еден и пол час во собата за шминкање за да се трансформира за улогата на невестата.
Зборувајќи за долгиот процес на подготовка, Бејл опишал како се справувал со седењето со часови секој ден.
„Врескав како луд, секој ден. Само за да го ослободам очајот, целата таа воздржаност што мора да ја покажете кога седите мирно толку долго“, објасни тој.
Додал дека не сакал да го прави тоа надвор од собата за шминкање.
„Не сакав да го правам тоа на пат кон работа бидејќи мислев дека може да предизвикам сообраќајна несреќа, а не сакав да го правам тоа сам бидејќи мислев дека сите ќе мислат дека сум луд“, изјавил Бејл.
Според него, филмската екипа на крајот му се придружила во процесот.
„Целата екипа се вклучи до крајот бидејќи луѓето нè слушаа како врескаме. Ја отворавме вратата и постепено, малку како револуционерите, некои луѓе ќе речеа: Можеме ли и ние да го направиме тоа? А потоа, до крајот, ќе имаше околу 30 луѓе кои ќе нè слушнат и ќе трчаат кон приколката за шминка за да бидат дел од тоа“, додал тој.
Бејл е познат по интензивните физички трансформации во текот на својата кариера. За „Аmerican Psycho“, тој бил на диета со висок внес на протеини за да се здебели, додека за „The Machinist“, за четири месеци ослабнал 27 килограми, достигнувајќи тежина од 56 килограми. Неговата исхрана потоа се состоела од вода, јаболко и една шолја кафе на ден.
После тоа, тој се здебелил 45 килограми мускули за шест месеци за да го игра Брус Вејн во филмот на Кристофер Нолан „Batman: Begins“.
