Кога ќе се спомне здрава исхрана, повеќето луѓе автоматски замислуваат чинија полна со салата.
Иако полиците во продавниците денес се богати со разновиден зеленчук во текот на целата година, во секојдневната исхрана најчесто ги консумираме истите неколку избори: марула, морков, брокула, евентуално спанаќ.
Сè друго често останува занемарено, иако токму меѓу тие намирници има и такви со исклучително силни здравствени придобивки.
Затоа е важно од време на време да излеземе од рутината. Со воведување на поретко користен зеленчук во исхраната, можете значително да придонесете за здравјето на цревата, долговечноста и општото чувство на виталност. Таквите намирници не делуваат површно, туку го поддржуваат организмот на клеточно ниво, помагајќи му да се обновува и да се заштити.
Кардиоваскуларниот хирург Стивен Гандри за „Make It“ навел пет „заборавени“ намирници кои се многу важни за здравјето на луѓето.
Пашканатот е прв на листата.
Иако некогаш бил редовна состојка во домашната кујна, денес се користи само повремено. Богат е со влакна кои ги „хранат“ корисните бактерии во цревата, што има директно влијание врз дигестијата, имунитетот и општата состојба на организмот. Има благ, малку слаткаст вкус и одлично се вклопува во чорби, печени јадења и зеленчукови пиреа.
На второ место е бамијата — зеленчук кој е достапен и кај нас, но ретко се приготвува.
Иако има специфична текстура, бамијата е богата со влакна и растителни соединенија што можат да придонесат за постабилно ниво на шеќер во крвта и за заштита на дигестивниот систем. Кога се пече или кратко се запржува на висока температура, слузавоста се намалува, а хранливите материи се задржуваат.
Третата намирница е радич (италијанска цикорија), кој често погрешно се поистоветува со црвена зелка.
Неговата блага горчина всушност е предност, бидејќи горчливиот зеленчук ја поттикнува дигестијата и помага во контролата на апетитот, особено желбата за благо. Радичот е богат со антиоксиданти кои ги штитат клетките и придонесуваат за здравјето на срцето и крвните садови.
Коренот од целер го зазема четвртото место.
Додека стебленцето често се користи, самиот корен неправедно останува запоставен. Има помалку јаглехидрати од компирот, а изобилува со влакна и витамин К. Може да се подготвува како пире, да се пече во рерна или да се користи како замена за покалорични прилози, со поблаг ефект врз нивото на шеќер во крвта.
Листата ја заокружува келераба – освежувачки и крцкав зеленчук што лесно се вари, а обезбедува изобилство од витамин Ц, минерали и влакна.
Одлична е како лесна ужина, додаток во салати или благо термички обработена како прилог. Заситува, а воедно е лесна за дигестивниот систем.
Пред поголеми промени во исхраната секогаш е препорачливо да се посоветувате со здравствен експерт. Добар почеток може да биде едноставната цел: да воведете еден нов вид зеленчук секоја недела. Така купувањето намирници станува поинтересно, а телото многу брзо покажува дека знае да ја цени разновидноста.
