Нијагарините водопади, кои се протегаат долж границата меѓу Соединетите Американски Држави и Канада, делумно се замрзнаа поради ниските температури што во овој регион деновиве се спуштаат и до околу минус 11 степени Целзиусови, пишува „Глобал њуз“.
И покрај зимската ледена магија, водата и понатаму тече под дебелиот слој мраз, додека замрзнатата околина и импресивните ледени формации привлекуваат посетители од целиот свет. Ниските температури и снежните услови ги претворија каскадните делови од водопадите во масивни ледени наслаги.
Иако на прв поглед изгледа како водопадите целосно да се замрзнати, водата непречено продолжува да тече под слојот мраз и замрзнатата магла. Кристализираните магливи облаци создаваат мали ледени парчиња што пловат по водата, создавајќи впечаток дека водопадите се целосно замрзнати.
За време на силни поларни бранови, температурите во ова подрачје можат да се спуштат и до минус 20 степени, при што речиси сè околу нив замрзнува.
Сепак, поради огромниот обем на вода и силниот тек, Нијагарините водопади не можат целосно да се замрзнат. Современите инфраструктурни системи дополнително помагаат во одржувањето на протокот. Последен пат водопадите биле замрзнати до таа мера во 1948 година, кога силни ледени ветрови од езерото Ири го блокирале изворот на реката и го запреле текот на водата. Подоцна беше поставена ледена заштитна преграда на местото каде што реката Нијагара се влева во езерото Ири, со цел да се спречат слични појави.
И покрај екстремниот студ, посетителите беа воодушевени од зимскиот спектакл.
„Ја славиме нашата десетгодишнина заедно“, изјави Стивен Ероко, кој ги посети водопадите со својата партнерка Лаора Џонстон од Ошaва, Онтарио, на која таму ѝ предложи брак.
„Слушнавме дека во зима е прекрасно тука, па решивме да дојдеме и сами да се увериме“, додаде тој.
Замрзнатите ледени облици на водопадите, заледените дрвја и делумно замрзнатата вода ги воодушевија и домашните и странските посетители.
„Прекрасно е, навистина многу убаво“, рече Ероко, опишувајќи ги ледените формации и делумно замрзнатата хидроцентрала, додека неговата партнерка ја опиша глетката како „навистина необична“.
Меѓу посетителите беа и Мирна Гонзалес и Фернандо Нието од Мексико, кои живеат во Канада од 2000 година.
„Обожаваме да доаѓаме во зима, бидејќи доживувањето е неверојатно. Студено е, но е прекрасно — вистинска канадска убавина“, изјави Нието.
