Станува збор за млади родени меѓу 1995 и 2012 година, кои растеле со паметни телефони, интернет и социјални мрежи, под постојан притисок да бидат продуктивни и успешни, пишува „Путни кофер“.

Како одговор на овој тренд, во Малезија неодамна беше отворен несекојдневен објект – „пензионерски дом за млади“, наменет токму за исцрпени млади луѓе. Сместен во градот Гопенг, во округот Кампар, овој комплекс нуди „месечно бегство од капитализмот, забрзаниот начин на живот и опсесијата со постигнување цели“.

За 360 евра можете да престојувате во мирен комплекс и да не правите апсолутно ништо

За околу 360 евра, посетителите можат да престојуваат во мирен простор опкружен со природа и да се посветат на нешто што ретко си го дозволуваат – апсолутно ништо. Нема распоред, нема состаноци, нема канцеларии од 9 до 17 часот.

Комплексот се простира на осум хектари и нуди сместување, три оброци дневно и спокојна атмосфера, далеку од секојдневниот метеж.

Станарите спијат додека сами не се разбудат, јадат домашна и здрава храна, садат зеленчук (секако, само ако воопшто имаат желба за тоа) или едноставно ги поминуваат мрзеливите попладнева во „активности“ како што се фантазирање и сонување, пишува „Relevant Magazine“.

Сè се сведува на ова: „Понекогаш е доволно да легнеш и малку да се одмориш“

Филозофијата која стои зад првата малезиска „пензионерска куќа за млади“ се нарекува „tang ping“ и се однесува на кинеско општествено движење кое во буквален превод значи „легни рамно“. Всушност, станува збор за тивок отпор против идејата дека животот мора да биде бесконечна трка за кариерни цели и финансиска сигурност. Наместо постојано искачување по општествената скала, „tang ping“ порачува: „Понекогаш е доволно само да легнеш и малку да се одмориш“.

Идејата за оваа бизарна куќа не се појавила одеднаш. Основачот, кој сака да остане анонимен, во малезискиот град Ипох веќе води традиционален дом за постари лица, а потоа решил и на младите, кои веќе се „изгорени“ од стрес, да им обезбеди заслужен простор за предих, „пред целосно да ги исцрпат сите свои капацитети“, пренесува порталот „NDTV“.

Резултат? Ваков (не)пристап кон животот поттикнува уште поголемо бегање од одговорноста

Реакциите на неговиот потег засега се поделени. Некои го нарекуваат дистописки, додека други веќе сакаат да резервираат свој престој во необичната куќа. Но, треба да се има предвид дека „Gopeng Youth Retirement Home“ се пополнил целосно уште во првиот месец по отворањето.

Иако престојот во куќата овозможува живот без притисок, каде станарите сами го одредуваат темпото кое им одговара, а при тоа не мораат да се грижат за кирија, режиски трошоци, готвење или општествени очекувања, критичарите се плашат дека ваквиот пристап кон животот може да поттикне уште поголемо бегање од одговорност. И долгорочно гледано, тоа никако не може да биде добро…