Италијанската инфлуенсерка Кјара Ферањи е ослободена од обвиненијата за тешка измама во таканаречениот процес „Pandorogate“, кој беше фокусиран на наводно измамнички хуманитарни кампањи.
Обвинителите во Милано ја товарија Ферањи, која во овој процес можеше да заврши и зад решетки, дека во 2022 и 2023 година ги доведувала потрошувачите во заблуда промовирајќи продажба на лимитирано издание на колачот пандоро, произведен од италијанската кондиторска компанија „Balocco“. Според кампањата, зголемената цена требало директно да оди за лекување на деца.
Сличен случај се однесувал и на велигденските јајца со брендот на Ферањи, кои биле промовирани како поддршка на здружението „I Bambini delle Fate“, кое им помага на деца со аутизам.
Ферањи, која се најде под силен притисок од јавноста и правосудството, се извини веднаш по избувнувањето на контроверзиите и вети дека ќе донира еден милион евра на детската болница „Regina Margherita“ во Торино, која беше вклучена во иницијативата со колачот. Таа, исто така, уплати 1,2 милиони евра на здружението „Bambini delle Fate“.
„Сите сме емотивно погодени. Им благодарам на сите, на моите адвокати и на моите следбеници“, изјави 38-годишната инфлуенсерка по ослободителната пресуда.
Скандалот сериозно ја наруши популарноста на Ферањи на социјалните мрежи, намалувајќи го бројот на нејзините обожаватели и потресувајќи го нејзиното деловно царство, кое ги опфаќа секторите за убавина, лиценцирање и мода. На удар се најде и нејзиниот приватен живот, бидејќи бракот со популарниот рапер Федез колабираше под притисокот на јавноста.
Нејзиниот статус на најпрепознатлива италијанска инфлуенсерка го направи овој случај идеален тест за обвинителите и регулаторите, желни да испратат јасна порака до другите актери во брзорастечката и во голема мера нерегулирана економија на креатори на содржини.
Во декември 2023 година, италијанското тело за заштита на конкуренцијата ја казни Ферањи со повеќе од еден милион евра поради „нефер деловни практики“ поврзани со брендираниот колач пандоро.
Неколку месеци по избувнувањето на скандалот, конзервативната влада на премиерката Џорџа Мелони претстави предлог-закон, наречен „Ферањи закон“, со кој директно се таргетираат инфлуенсерите за кои постои сомнеж дека ја доведуваат во заблуда својата публика преку нејасни маркетиншки промоции. Засега не е познато дали обвинителите ќе поднесат жалба.
