„OpenAI“ ги поттикнува корисниците да прикачуваат здравствени картони и податоци од апликации за следење на здравјето и физичката активност, како „MyFitnessPal“, со цел да се понудат персонализирани препораки базирани на вештачка интелигенција.

Од компанијата нагласуваат дека разговорите во рамките на „ChatGPT Health“ ќе се чуваат одвоено од другите интеракции и нема да се користат за тренирање на моделите на вештачка интелигенција. Исто така истакнуваат дека алатката не е наменета за поставување дијагнози ниту за замена на лекарски третман.

Страв од злоупотреба на чувствителни податоци

Ендрју Крафорд од американската непрофитна организација „Центар за демократија и технологија“ предупреди дека од клучно значење е да се обезбедат цврсти и доверливи механизми за заштита на здравствените информации.

„AI алатките во здравството можат да ги зајакнат пациентите и да ги подобрат исходите од лекувањето, но здравствените податоци спаѓаат меѓу најчувствителните лични информации и мора да бидат посебно заштитени“, истакна Крафорд.

Тој додаде дека технолошките компании сè поинтензивно се стремат кон персонализација на своите услуги за да ја зголемат нивната пазарна вредност. „Особено во момент кога ’OpenAI‘ го истражува рекламирањето како потенцијален деловен модел, клучно е да се обезбеди строго раздвојување на здравствените податоци од останатите информации што ’ChatGPT‘ ги собира“, нагласи тој.

Нова ера на дигитално здравствено советување?

Според податоците на „OpenAI“, повеќе од 230 милиони корисници неделно го користат „ChatGPT“ за прашања поврзани со здравјето и општата благосостојба. Во објава на официјалниот блог, компанијата наведува дека „ChatGPT Health“ носи „подобрени стандарди за приватност“ со цел заштита на чувствителните информации.

Корисниците можат да ги поврзат податоците од апликации како „Apple Health“, „Peloton“ и „MyFitnessPal“, како и да прикачат медицинска документација, што овозможува попрецизни и поконтекстуални одговори. Од „OpenAI“ повторно нагласуваат дека алатката служи како поддршка за корисниците, а не како замена за стручна медицинска грижа.

Познато е дека генеративните AI системи понекогаш можат да создадат неточни или погрешни информации. И покрај тоа, Макс Синклер, основач и извршен директор на AI маркетинг-платформата „Azoma“, смета дека со овој потег „OpenAI“ се обидува да го позиционира „ChatGPT“ како доверлив извор на здравствени совети.

Тој го опиша лансирањето на „ChatGPT Health“ како можна „пресвртница“ што би можела да го промени начинот на кој пациентите пристапуваат до здравствените информации, но и да влијае врз потрошувачките навики поврзани со лекувањето и здравјето. Според него, оваа иновација би можела да ѝ даде предност на „OpenAI“ во сè поострата конкуренција со другите AI платформи, особено со „Gemini“ на „Google“.

Ограничена достапност и регулаторни пречки

Од „OpenAI“ најавија дека „ChatGPT Health“ во почетната фаза ќе биде достапен само за ограничен број корисници, со можност за пријавување на листа на чекање. Функцијата моментално не е достапна во Обединетото Кралство, Швајцарија ниту во земјите на Европската унија, каде што важат строги прописи за заштита на личните податоци.

Во Соединетите Американски Држави, пак, Крафорд предупредува дека ваквиот потег отвора простор за компании кои не се обврзани со строги закони за приватност да собираат и користат здравствени податоци на граѓаните.

„Кога самите компании ги дефинираат правилата за собирање, чување и споделување на здравствените информации, недоволните заштитни мерки можат да доведат до сериозни злоупотреби на чувствителните податоци“, заклучи Крафорд.