Најпопуларниот компактен спортски автомобил во светот, „Volkswagen Golf GTI“, во 2026 година ќе ја одбележи својата 50-годишнина. Од првиот модел од 1976 година досега се произведени повеќе од 2,5 милиони примероци од ова легендарно возило.
Најмоќниот „GTI“ во историјата
По повод јубилејот, „Volkswagen“ го претставува специјалното издание „Golf GTI EDITION 50“ со 325 коњски сили, што го прави најмоќниот сериски „Golf GTI“ модел досега. Ограничената серија веќе е достапна за нарачка во одделни европски земји, а испораките се планирани за 2026 година.
Брендот ќе направи и историски исчекор со претставување на првиот електричен „GTI“ модел – „ID. Polo GTI“ со 226 коњски сили, со што „GTI“ филозофијата влегува во ерата на електричната мобилност.
Почеток на прославата
Прославата на јубилејот ќе започне на саемите за класични автомобили во Париз („Rétromobile“, 28.01 – 01.02) и Бремен („Bremen Classic Motorshow“, 30.01 – 02.02), кои воедно ќе го означат и почетокот на европската сезона на класични автомобили во 2026 година.
„Golf GTI“ од своето претставување во 1976 година го револуционизираше светот на спортските автомобили со својата извонредна комбинација од перформанси, практичност и пристапност. Првиот модел со 110 коњски сили, препознатлив по црвената линија околу решетката на ладилникот и рачката на менувачот во форма на топче за голф, првично беше планиран во само 5.000 примероци, но продажбата ги надмина очекувањата дури десеткратно.
