Самоуверен, згоден и заводлив, маж кој не се плаши да танцува и во тој танц да ја премине границата на обичната кореографија, пејач што погодува високи тонови додека прави салто наназад. Тогаш имаше 32 години, а за формата на 53 можеме само да му симнеме капа.

Иако многумина очекуваа Сакис да стане светска ѕвезда, бидејќи имаше сè – квалитети и предиспозиции, тоа на некој чуден начин, не се случи. Почна силно, преку ноќ стана препознатлив во цела Европа (за родната Грција и целиот Балкан и да не зборуваме), во 2009 година повторно се појави на Евровизија во Москва, а потоа полека почна да исчезнува од радарот – барем кога станува збор за регионот. Во својата земја сè уште е еден од најпопуларните изведувачи.

Евровизија беше важен пресврт во кариерата, исто како и за неговата сонародничка Хелена Папаризу која беше женскиот еквивалент на неговиот успех и популарност.

Тешко детство

Иако сè во животот на Сакис изгледа бајковито, она што јавноста тогаш не го знаеше е дека зад гламурозниот сценски имиџ стои приказна полна со борба, откажувања и внатрешни падови.

Сакис е роден на 5 јануари 1972 година на островот Крф, во сиромашно семејство. Како најстар од четирите браќа, многу рано ја презел одговорноста што не му прилега на едно дете. Додека врсниците безгрижно си играле, тој се грижел за помладите и им помагал на родителите кои се бореле да им обезбедат основни услови за живот. Неговото детство било сè, освен лесно, а дополнителен товар претставувале проблемите со читање и пишување, кои му го отежнувале образованието и му ја нарушувале самодовербата.

Како тинејџер бил принуден да работи разни работи – на градилишта, како келнер, па дури и како автомеханичар. Музиката во почетокот му била само бегство од реалноста, но судбината имала други планови. Кон крајот на осумдесеттите, додека пеел во еден хотел, го забележал Елиас Псинакис, човек што ќе стане негов менаџер и клучна фигура во изградбата на неговата кариера. Благодарение на тој пресврт, Сакис прави први сериозни чекори на музичката сцена.

Ѕвезден успех „преку ноќ“

Веќе во 1990 година потпишува договори со големи светски дискографски куќи, што било извонреден успех за млад грчки изведувач од скромно потекло. Сепак, наглиот подем привремено го прекинува задолжителната воена служба, која ја одслужил редовно, и покрај популарноста и медиумското внимание.

Токму тој период, во комбинација со наглата слава и постојаниот притисок од таблоидите, оставил длабоки последици врз неговото ментално здравје. Сакис се соочил со силна анксиозност и агорафобија, а по завршувањето на воениот рок, одредено време поминал во психијатриска установа, обидувајќи се да ја врати внатрешната рамнотежа. Подоцна отворено зборуваше за таа борба и истакна дека враќањето кон музиката било единствениот вистински пат кон лекувањето.

Пејач, актер, водител и танчер

Амбициозниот Рувас никогаш не се ограничувал само на пеење. Во текот на годините се испробал како актер, водител, но и како ѕвезда на мјузикли, каде споил танц, актерство и музика. Се смета за еден од првите грчки поп-пејачи што вовел силен танцов идентитет по примерот на светските ѕвезди.

До денес објави 13 студиски албуми, од кои повеќето достигнаа златни и платинести тиражи, со што засекогаш го зацврсти своето место на врвот на грчката поп-сцена. Познат е и по хуманитарната работа, долгорочната соработка со „УНИЦЕФ“, како и по извонредната физичка дисциплина што му овозможила со децении да остане во врвна форма.

Гласини дека е геј, тој се ожени со манекенка

Приватниот живот често беше предмет на шпекулации и неосновани гласини, особено по евровизиските настапи, но вистината била далеку поедноставна и стабилна. Со манекенката Катија Зигоули започнал врска уште во 2003 година, а по 14 години заеднички живот и четири деца, решиле својата љубов да ја крунисаат со брак.

Свадбата била токму онаква каква што отсекогаш сакале – интимна и во кругот на семејството. Посебна симболика имало тоа што сите нивни деца учествувале во церемонијата: Сакис прв пристигнал во црквата со децата, носејќи го најмалиот син Аполон во рацете, додека останатите биле дел од свадбената поворка.

Денес изгледа речиси исто како пред повеќе од деценија, настапува како во најславните денови, води живот во баланс, а за семејството вели дека е неговата главна поддршка и најсилна потпора. И сето тоа се гледа на него.