Се базира на сосема поинаква хемија во споредба со старите оловно-киселински батерии.
Во одредени сегменти на авто-индустријата развојот оди многу брзо, но кај акумулаторите со години немаше значаен напредок. Така беше сè досега.
Американската компанија „Unigrid“ разви нов 12-волтен акумулатор за кој тврди дека има дури десет пати подолг работен век од класичниот оловен акумулатор, дека може да издржи екстремен студ и дека може целосно да се испразни без да се оштети.
Новиот акумулатор се темели на сосема поинаква хемија во однос на старите оловно-киселински батерии и користи натриум-јонски ќелии NaCrO₂, пишува „Revijahak“.
Како главна состојка се користи обична сол. Предност во однос на литиум-јонските батерии е и тоа што ризикот од пожар е помал и што новиот акумулатор не може да предизвика таканаречен „топлотен бег“.
Во „Unigrid“ велат дека предностите се значителни во споредба со оловните акумулатори. Батеријата треба да може да се полни и празни повеќе од 5.000 пати, и во топли и во студени климатски услови, што е десет пати повеќе од оловно-киселинската батерија.
Доколку автомобилот треба да го паркирате на подолг период, не е важно дали батеријата е целосно испразнета – таа нема да се оштети.
Наводно, овој акумулатор има двојно поголема стартна енергија во студени услови во споредба со традиционалната 12-волтна батерија.
Новиот акумулатор би требало да биде и поевтин од батериите на база на олово. Од „Unigrid“ наведуваат дека веќе започнале со продажба на новиот акумулатор на производители и дистрибутери на автомобили.
