Швајцарскиот пејач Немо, победникот на Евровизија 2024 година, објави дека ќе го врати својот трофеј откако на Израел му беше дозволено да учествува на натпреварот во 2026 година.
Во изјава споделена на Инстаграм, пејачот Немо рече: „Минатата година ја освоив Евровизија, а со тоа и трофејот. И додека сум неизмерно благодарен на заедницата околу овој натпревар и на сè што ме научи ова искуство како личност и како уметник, денес повеќе не чувствувам дека овој трофеј ѝ припаѓа на мојата полица“.
Уметникот го искритикувал „јазот“ помеѓу принципите на Евровизија и постапките на ЕБУ.
Нагласувајќи дека овој став не е насочен кон поединечни изведувачи, Немо додал дека „натпреварот постојано се користи за да се омекне имиџот на земја обвинета за сериозни прекршувања, додека ЕБУ инсистираше дека Евросонгот е „аполитичен“. И кога цели земји се повлекуваат поради оваа контрадикција, треба да биде јасно дека нешто е длабоко погрешно“.
Затоа Немо одлучил да го врати трофејот, објаснувајќи: „Го испраќам мојот трофеј во седиштето на ЕБУ во Женева. Со благодарност и јасна порака: Живејте го она што го кажувате“.
Победникот на Евровизија завршил велејќи: „Ако вредностите што ги славиме на сцената не се живеат надвор од сцената, тогаш дури и најубавите песни го губат своето значење. Го чекам моментот кога тие зборови и дела ќе се совпаднат. Дотогаш, овој трофеј е ваш“.
Неколку учесници на Евровизија 2024 ја изразиле својата поддршка за Немо на социјалните мрежи. Португалската пејачка Јоланда коментирала на објавата на Немо велејќи: „Засекогаш на вистинската страна од историјата“, додека грчката музичарка Марина Сати напишала: „Те сакам, душо!“.
Одлуката на ЕБУ да му дозволи на Израел да учествува предизвика низа реакции: Ирска, Шпанија, Словенија и Холандија објавија бојкот на натпреварот, додека кратко потоа Исланд исто така одлучи да го повлече својот настап. Евровизија 2026 ќе се одржи во Виена, по победата на австрискиот уметник Џеј Џеј на овогодишното натпреварување.
Немо и претходно ги поддржал повиците за исклучување на Израел од Евровизија во 2025 година, наведувајќи:
„Јас лично сметам дека нема смисла Израел во моментов да учествува на Евровизија. Нивните постапки се спротивни на вредностите што натпреварувањето наводно ги претставува – мир, единство и почитување на човековите права“, рекол тој.
Директорот на Евровизија, Мартин Грин, претходно ја разјаснил позицијата на ЕБУ во изјава, нагласувајќи дека натпреварот првенствено е регулиран со правила и дека секоја земја или радиодифузер што не ги почитува ќе биде повикана на одговорност.
„Евровизија е создадена пред 70 години во поделена Европа како симбол на единство, мир и надеж преку музика. Ние не ги променивме тие темели. Натпреварот е место каде што луѓето од цела Европа и светот можат заедно да ја прослават креативноста и поврзаноста и покрај предизвиците“, изјавил Грин.
