Паметните телефони одамна се уред без кој многумина не можат да поминат ниту еден час, а денес тешко излегуваме од дома и без паметни часовници. Следниот уред кој би можел да стане задолжителен „џебен“ (или подобро речено – „рачен“) додаток е паметниот прстен.

Иако свој паметен прстен претставија и компании како „Samsung“, најпознат бренд во оваа категорија несомнено е „Oura“, пред сè затоа што го користат бројни спортисти и славни личности. Прстенот на „Oura“ ги следи активностите на корисникот и обезбедува детална анализа – на пример, за квалитетот на спиењето, тренинзите, закрепнувањето и движењето.

Но, како што откри извршниот директор на компанијата Том Хејл, плановите на „Oura“ се многу поголеми. Иако и понатаму ќе биде уред за следење на здравјето и секојдневните активности, во иднина овој прстен би можел да ги замени работите без кои никогаш не ја напуштаме куќата – клучевите, личните документи и паричникот.

Дигитален идентитет и плаќање

Во интервју за „Business Insider“, Хејл најави дека „Oura“ сака да влезе во сосема ново поле – дигитален идентитет и бесконтактно плаќање.

Додека голем дел луѓе одамна не користат готовина, а сè повеќе плаќаат со телефонот или часовникот, „Oura“ планира во своите прстени да вгради можност за директно плаќање. Практично, повеќе нема да биде потребен ни мобилен – ќе биде доволно само да го допрете прстенот до терминалот.

Со паметните брави, прстенот би можел да ги отклучува вратите, а може да се користи и за пристап до деловни простории каде денес се потребни посебни магнетни картички. Исто така, би можел да служи како клуч за пристап до деловни компјутери и други ограничени системи.

Хејл нагласува дека нивниот прстен веќе е биометриски уред кој „го препознава“ својот сопственик, па затоа нема пречки да се користи како сигурен идентификациски инструмент.

Кога ова би станало реалност, сè уште не е познато, бидејќи компанијата се соочува со бројни технички предизвици – пред сè вградување на NFC-чип во толку мал уред. Дополнителен проблем е и слабеењето на сигналот поради контактот со кожата на прстот.

Инаку, вредноста на компанијата по последната инвестициска рунда, во која беа собрани 900 милиони долари, достигна 11 милијарди долари. „Oura“ планира овие средства да ги искористи за дополнителна меѓународна експанзија.