Околу 15 отсто од Американците би биле подготвени да работат на работно место каде нивниот директен претпоставен би бил програма со вештачка интелигенција која доделува задачи и ги одредува распоредите, наместо човек, се наведува во истражување на Универзитетот „Quinnipiac“.
Поголемиот дел од испитаниците сè уште ја отфрлаат таквата можност, но трендот на раст на довербата во управување со AI станува сè поочигледен, паралелно со ширењето на примената на вештачката интелигенција во компаниите.
Технолошки решенија што ги автоматизираат менаџерските функции веќе воведуваат компании како „Amazon“ и „Workday“, додека во „Uber“ инженерите дури развиле и AI модел на извршен директор за првично разгледување на бизнис-идеи, пренесува „TechCrunch“.
Овој тренд е дел од поширока промена во организацијата на работата што аналитичарите ја нарекуваат „големо порамнување“, при што се намалува бројот на средни менаџерски нивоа, а AI автоматизацијата презема дел од нивните функции, пренесува „Tanjug“.
Во екстремно сценарио се споменува и можноста за појава на компании вредни милијарди долари кои функционираат со минимален број вработени, потпирајќи се на автоматизирани процеси и AI системи.
Зголемената употреба на вештачката интелигенција предизвикува загриженост кај работниците.
Дури 70 отсто од испитаниците сметаат дека развојот на вештачката интелигенција ќе го намали бројот на работни места за луѓето, додека 30 отсто од вработените изразуваат загриженост дека токму нивното работно место би можело да стане непотребно.
Истражувањето е спроведено на примерок од 1.397 возрасни лица во Соединетите Американски Држави, во периодот од 19 до 23 март.
