Кога „Google“ го претстави својот алат за генерирање фотографии „Nano banana“, корисниците се воодушевија од неговите можности, квалитетот и пред сè од реалистичниот изглед на сликите. Кај многу од нив беше навистина тешко, речиси невозможно, да се препознае дека не се вистински, туку генерирани со помош на вештачка интелигенција.

Компанијата сега ја претстави подобрената верзија на овој алат – „Nano banana Pro“, а самото име доволно говори: неговите можности се уште поголеми, што значи дека непостоечките, односно лажните фотографии ќе изгледаат уште пореално.

По објавувањето на новиот алат, на интернет се појавија две верзии од една AI-фотографија на која се гледа девојка што седи во кафеана. Левата фотографија е направена со „Nano banana“, додека десната е генерирана со новиот, понапреден „Nano banana Pro“. Фотографијата создадена со „Pro“ варијантата е толку реалистична што корисниците на платформата „X“ напишаа дека тоа го означува крајот на традиционалната фотографија. „Готово е!“, кратко и јасно прокоментираа – ерата на фотографските докази завршува. „Сликите повеќе не се сведоци, туку само хипотези“, сликовито го објасни ситуацијата водителката на поткаст Маалвика Бхат.

Огромен напредок за кратко време

Овие фотографии, пренесува „Newsweek“, го запалија интернетот затоа што јасно покажуваат колкав напредок е постигнат за многу краток период. На оваа страница објаснуваат дека левата верзија има „класичен“ AI-ефект – многу е сјајна и ретуширана, додека десната фотографија направена со „Nano banana Pro“ изгледа како да е преземена од „Instagram“ профил на некоја млада девојка. Текстурата и тонот на сликата изгледаат вистински, а за корисниците станува речиси невозможно да ја забележат разликата меѓу оваа верзија и вистинска фотографија.

Едно истражување направено пред две години покажа дека само 61 проценти од луѓето можат точно да препознаат AI-фотографија. А такви слики се шират по интернет со години – меѓу најпознатите се измисленото апсење на Трамп или фотографијата на папата во бела „бафер“ јакна.

Иако постојат технологии кои можат да препознаат лажна фотографија од вистинска, тие не се сто проценти сигурни, а очигледно е дека луѓето нема да ги користат за секоја слика што ќе ја видат. Она што ни го носи иднината е сосема извесно: ќе гледаме на фотографиите (и видеата), особено на необичните, како на потенцијално лажни. Границата меѓу вистинското и измисленото ќе станува сè потенка.