3,7 милиони Кинези ќе полагаат испит за државна служба: Се надеваат на доживотно вработување

Околу 3,7 милиони луѓе се пријавиле за тестовите во сабота и недела, што ќе бидат првите тестови откако владата ја зголеми старосната граница за одредени позиции.

Старосната граница за општите кандидати е зголемена од 35 на 38 години, додека старосната граница за оние што имаат завршено постдипломски студии е зголемена од 40 на 43 години.

Милиони кандидати ќе се натпреваруваат за 38.100 слободни работни места во државната служба.

Некои работни места се особено барани. Според податоците објавени во кинеските медиуми, повеќето од апликациите се однесуваат на позицијата службеник за имиграција во Руили, град во југозападната покраина Јунан што граничи со Мјанмар. 6.470 апликации беа одобрени за едно работно место.

Во октомври Пекинг објави дека старосната граница за полагање испити за државна служба ќе биде зголемена во согласност со неодамнешното зголемување на возраста за пензионирање во Кина.

Иако вработените во јавниот сектор генерално имаат пониски плати, а во последниве години некои задолжени локални власти се борат да ги исплатат платите, овие работни места се сè попосакувани поради нивната сигурност во сè попредизвикувачката економија.

Стапката на невработеност во Кина изнесува 5,1% за општата работна сила и 17,3% за лицата на возраст од 16 до 24 години, без студентите.

Во 2023 година, владата привремено престана да објавува податоци за невработеноста кај младите, која достигна рекордни 21,3%, и продолжи со објавувањето по неколку месеци со нова методологија што ги исклучува студентите.

Испитот за државна служба е познат по својата исцрпувачка природа, со прашања од право, физика, биологија, политика и логичко расудување.

Од минатата година, постои и дел за политичка теорија, кој „се фокусира на способноста на кандидатите да анализираат и решаваат проблеми користејќи иновативни теории на Партијата“.