Данскиот авантурист Хенрик Јепесен посетил 193 земји, а во ново интервју открил кој европски град целосно го воодушевил и им препорачал на сите да го посетат.
Јепесен го истражува светот уште од 17-годишна возраст, а досега посетил повеќе од 2.000 дестинации.
„Најдобриот град во Европа, според мене е главниот град на Естонија, Талин. Тој е многу занемарен од луѓето што патуваат во Европа, а многумина никогаш не биле таму. Дури иако биле во Европа два или три пати, тие обично одат во Лондон, Рим, Париз и Берлин, на такви места, па во таа смисла, мислам дека е многу потценет“, рекол тој во интервју за „Mirror.co.uk“.
Објаснувајќи што го прави Талин толку посебен, Јепесен вели дека, пред сè, тој е многу поевтин од градовите што ги споменал.
„Потоа тука е Стариот град, кој мислам дека е најдобриот стар град во целиот свет, а јас многу патував. Тоа е како да влегувате во нов свет со добро зачувани стари згради и атмосфера што не сте ја виделе никаде на друго место“, истакнал тој.
Стариот град е на списокот на светско наследство на УНЕСКО, каде што лесно можете да поминете неколку дена со фантастична храна за многу малку пари.
„Ручав за пет евра во „Ратаскаеву 16“ околу 40 пати и тоа е извонреден ресторан и искуство. Многу ресторани имаат слични цени, па затоа е одлична вредност за јадење надвор и нешто што навистина го ценам, доаѓајќи од Данска“, раскажал Јепесен.
Тој, исто така, го пофалил квалитетот на воздухот, бесплатниот јавен превоз за туристите и ниските цени на влезниците во музеите и голем број други атракции во градот. Исто така, има неколку блиски острови за истражување, како што се Сааремаа и Хиумаа, како и градот Парну, кој е познат како „летна престолнина“ на Естонија поради своите огромни бели песочни плажи.
„Тоа е прекрасно место за посета, особено во лето. Парну, Виљанди и островите дефинитивно вреди да се посетат, особено ако ја посетувате земјата повеќе од една недела“, објаснил тој.
Исто така, му се допаднало што луѓето биле пријателски расположени и секогаш подготвени да помогнат. Кога се изгубил додека го истражувал градот во 2014 година, минувачите му помогнале да се врати во хотелот.
„Во колку европски престолнини би ве однел некој што сте го сретнале на улица? Не мислам дека тоа би се случило во Лондон“, нагласил Данецот, додавајќи дека има прекрасни спомени од Талин.
Денес
