Во истражувањето биле опфатени најчестите дефекти регистрирани преку алатот "Carly" во период од десет години. Цените на поправките, според "Auto Bild", се темелат на "cost-calculator" специфичен за секоја марка, а за оваа анализа биле пресметани просечни вредности.

Возачите на „BMW“ плаќаат најмногу

Резултатите го потврдија очекуваното: првите три места на листата на најскапи поправки ги заземаат премиум марките. На врвот е "BMW", чии сопственици при посета на сервис во просек плаќаат импресивни 1.150 евра.

Сепак, анализата открива дека постојат големи разлики меѓу моделите. Така, „BMW“ серија 5, со просечен трошок од 1525 евра, се издвојува како еден од најскапите модели. Најчестите дефекти што ги идентификувал "Carly" се замена на филтер за честички и дефекти на ламбда-сонда – два многу скапи зафати.

Од друга страна, серијата 3, со просечен трошок од 875 евра, во оваа споредба изгледа речиси поволно.

„Audi“ и „Mercedes“ веднаш зад "BMW"

На второ место е "Audi" со просечни трошоци за поправки од 989 евра. Интересно е што некои модели се значително поскапи од просекот – изненадувачки предничи „Audi A1“ со цена на сервисирање од 1.235 евра.

Кај примероците произведени до 2015 година чести се проблеми со растегнати ланци на дистрибуција, а на техничките прегледи често се забележуваат оштетени пружини и амортизери.

Само нешто поевтин е "Mercedes" со просечен трошок од 942 евра. И тука има исклучоци – моделот „CLA“ чини во просек 1.135 евра, додека „C-Class“, со трошок од 800 евра, значително го спушта вкупниот просек на марката.

„Opel“ – најповолна марка за одржување

Зад премиум тројката се наоѓа "Volkswagen" со просечен трошок од 767 евра, потоа следуваат Ford (588 евра) и Hyundai (575 евра).

Според оваа анализа, најдобро поминуваат сопствениците на „Škoda“ и „Opel“. Просечниот трошок за поправка кај чешката марка изнесува 450 евра, додека „Opel“, со само 375 евра, е апсолутен победник по пристапност – неговите поправки чинат помалку од една третина од трошокот на „BMW“.

Важно предупредување

Треба да се спомене дека "Carly" во својата анализа опфатил само 21 популарен модел, па некои марки недостасуваат.

На пример, не е познато дали моделите на „Dacia“ се подеднакво евтини за поправка како што се при купување. Исто така, не е направена разлика меѓу нови и половни автомобили, ниту меѓу различни генерации на исти модели.

Во заклучок, студијата уште еднаш потврдува дека луксузот има своја цена, додека кај „Opel“ – барем кога станува збор за сервисирање – навистина може да се живее без непотребни финансиски шокови.