Вечера на технолошките моќници

Комбинацијата од пржено пилешко и ладно точено пиво — позната под локалното име „chimaek“ — е задолжително искуство за секој што ја посетува Јужна Кореја. Технолошките лидери се собрале во ресторанот „Kkanbu Chicken“ во центарот на Сеул, во пресрет на „APEC“ самитот што се одржува во Гјонгџу.

Покрај тоа што е име на синџир ресторани, „Kkanbu“ во корејскиот сленг значи „близок пријател“.

„Обожавам пржено пилешко и пиво со пријатели, па затоа ’Kkanbu‘ е совршено место, нели?“, изјавил Хуанг пред насобраните, додека настанот бил пренесуван во живо по неговото пристигнување.

Според националната новинска агенција „Yonhap“, тројцата милијардери — чие заедничко богатство се проценува на 195 милијарди долари — уживале во топчиња и стапчиња од сирење, пилешко без коски и класично пржено пилешко. Сето тоа го прелеале со корејско пиво „Terra“ и традиционалниот оризов жесток пијалак „Соју“.

На видеата од локалните медиуми може да се види како тројцата ги спојуваат рацете во наздравување со пиво — гест што во Јужна Кореја симболизира зајакнување на пријателството.

Кога милијардерите плаќаат за сите

Хуанг, Ли и Чунг подоцна излегле надвор и на присутните фанови им делеле парчиња пилешко и стапчиња од сирење.

„Крилцата беа феноменални. Дали сте биле овде порано? Неверојатно е, нели?“, рекол Хуанг кога го прашале кое јадење му е омилено. „Некој? Пржено пилешко?“, прашувал насмеано, држејќи корпи со храна во рацете.

Кога Хуанг го притиснал „златното ѕвонче“ — гест со кој се означува дека некој ја плаќа сметката за сите гости во ресторанот — просторијата избувнала во одушевување. Сепак, како што пренесува „Yonhap“, првата сметка всушност ја платил Ли од „Samsung“, додека Чунг од „Hyundai“ ја покрил втората тура.

Во пресрет на самитот „APEC“

Овој неформален состанок се случил непосредно пред почетокот на самитот „APEC“ во Гјонгџу, каде што пристигнале бројни азиски лидери, меѓу кои и кинескиот претседател Си Џинпинг, кој доаѓа по серијата трговски разговори со американскиот претседател Доналд Трамп.

Пристапот до најсовремените чипови за вештачка интелигенција — какви што ја направија „Nvidia“ компанија вредна околу 5 билиони долари — претставува едно од клучните прашања во односите меѓу САД и Кина.

Голема најава за иднината на Кореја

По вечерата, тројцата директори се упатиле на „Nvidia GeForce Gamer Festival“. Таму, опкружен со Ли и Чунг, Хуанг најавил дека ќе следи голема објава на самитот „APEC“ во петок.

„Моите најави ги вклучуваат моите пријатели — и ќе направиме неверојатни работи за иднината на Кореја“, изјавил Хуанг пред насобраните обожаватели.