Бројот на американските државјани кои вложуваат во грчки недвижнини преку програмата „златна виза“, се зголемил за 40 отсто во третиот квартал на 2025 година.
Порастот на интересот доаѓа и без оглед на заострување на условите од 2024 година, кога минималната инвестиција била зголемена на 800.000 евра за купување недвижнини во Атина, Солун и на поголемите острови, додека пак во останатиот дел од земјата, границата сега изнесува 400.000 евра, пренесува „Екатимерини“.
Според податоците на канцеларијата на Варнавас, вложувањето на американските државјани често надминува милион евра, а јужните крајбрежја на Атина и пристаништето Пиреј и натаму се најбараните локации.
Како главни причини за вложување во Грција, американските инвеститори ги наведуваат поволните цени, животниот стил како и безбедноста и стабилноста на земјата.
За да ги одбегнат повисоките прагови на вложување, сѐ повеќе американски вложувачи ја користат опцијата вложување од 250.000 евра – купување на комерцијални недвижнини како индустриски објекти кои потоа се пренасочени во станбен простор. Инвеститорите и на овој начин можат да остварат право на „златна виза“ во Грција.
„Оваа нова можност веќе има ефект на пазарот. Странските инвеститори ги претвораат напуштените индустриски згради од времето на грчката криза во станбени блокови со што ја зголемуваат понудата и внесуваат нова ликвидност и капитал во реалната економија“, изјавил правникот Александар Варнавас.
