Татко од Лондон, кој стана познат по тоа што трчал маратон со ранец тежок 20 килограми во знак на сеќавање на својот починат син, сега отиде чекор понатаму. Сери Менаж-Дејвис пешачел повеќе од 100 километри за да ја предупреди британската влада за потребата од закон што би им помагал на родителите во најтешките моменти од животот, пишува „LADbible“.

Четири години откако неговиот шестгодишен син Хју починал од редок облик на рак, таткото тргнал на долг пат. На грбот носел ранец тежок 20 килограми — тежината на неговиот син во моментот на смртта. Овојпат, ранецот бил испишан со имињата на 450 деца кои се борат со рак и со последните обувки на Хју, кои никогаш повеќе не ги обул.

„Враќањето во болницата беше исклучително емотивно. Тоа беше првиот пат откако влегов таму по заминувањето на Хју во 2021 година. Секој чекор беше тежок,“ признал таткото.

Патот бил напорен и физички исцрпувачки.

„Првиот ден поминавме 45 километри, вториот 50 километри — нозете беа на работ на издржливоста,“ опишал таткото, кому за време на патувањето поддршка му пружале сопругата и родителите.

Зошто Хјуов закон?

На целта тој ги оставил чевлите на Хју и предал писмо потпишано и поддржано од повеќе од 150 пратеници. Во писмото се бара воведување на „Хјуовиот закон“.

„Хјуовиот закон би им овозможил на родителите да бидат покрај своето тешко болно дете без страв дека ќе ја изгубат работата. Ова не се однесува на вообичаени болести или скршеници, туку на најтешките ситуации, како што е ракот,“ изјавил таткото.

Законот би се применувал во првите три месеци од лекувањето — период што Сери го нарекува „најтешкиот во животот“ — со цел родителите да добијат финансиска и емоционална поддршка од првиот ден. Сери верува дека, доколку законот помогне барем на еден родител или едно дете, целиот негов труд ќе има смисла.

„Поддршката од луѓето беше неверојатна, а некои пораки ме трогнаа до солзи,“ додал тој.