„Ни требаа повеќе од час и половина да го извлечеме. Кога конечно го здогледавме, не можевме да им веруваме на очите – беше огромен, со глава како чудовиште“, изјави Кристоф Пира.
Неверојатен улов во акумулациското езеро „Рибники“ на југот на Полска го воодушеви светот на спортскиот риболов. За време на натпревар во спортски риболов, фатен е сом долг дури 292 сантиметри, што според сите показатели претставува нов светски рекорд, пишува „Sokszinuvidek“.
Џиновската риба ја уловиле Кристоф Пира и Адриан Гонтарц, членови на риболовниот клуб „Akademia Wędkarska“ од Лублин. Двајцата се натпреварувале во дисциплината спининг, техника на риболов при која предаторски риби се ловат со подвижни, вештачки мамки.
„Ни требаа повеќе од час и половина да го извлечеме. Кога конечно го извадивме на површина, не можевме да веруваме – беше колосален, со глава како на филмско суштество“, изјави Пира за порталот „sport.pl“.
По мерењето беше потврдено дека сомот е долг 292 сантиметри, со што го надмина претходниот светски рекорд од 285 сантиметри, поставен во Италија во 2023 година на реката По.
„Ова не е само нов полски рекорд – ова е светски рекорд“, со гордост додаде Пира.
По официјалното мерење, рибата е вратена назад во езерото, во согласност со правилата на натпреварот и принципите на одржлив риболов.
Акумулациското езеро „Рибники“ одамна е познато како рај за риболовците. Во него живеат бројни крупни видови, меѓу кои најмногу се истакнуваат сомовите и шараните.
Според експертите, огромната големина на рибите во ова езеро може да се припише на специфичните услови – водата се користи за ладење на термоелектрана на јаглен, поради што е постојано потопла од просекот, што овозможува побрз раст на рибите.
Овој импресивен улов не само што им донесе светска слава на двајцата риболовци, туку уште еднаш го потврди статусот на „Рибники“ како една од највпечатливите риболовни дестинации во Европа, пренесува „AgroKlub“.
