Според државната телевизија „ERR“, инцидентот се случил вечерта на 11 октомври, кога естонските гранични патроли забележале голем број униформирани и вооружени лица во близина на границата. Поради можни инциденти и за заштита на населението, преминот веднаш бил затворен.

„Во текот на денот, забележавме значително поголема активност од вообичаеното во областа Сааце. Видовме движење на различни вооружени групи на самата граница и нејзината непосредна околина. Од униформите јасно можеше да се види дека тие не биле припадници на граничната служба“, рече Мелис Саарепу, раководител на Бирото за граници на Јужната префектура.

Естонската гранична служба испрати официјално барање за објаснување до Русија, но од Москва дојде одговор дека „ништо не се случува“ и дека станува збор за „рутински активности“.

Видео прикажува „мали зелени луѓе“

Полицијата и Граничната стража објавија и видео на кое се гледаат седум вооружени мажи како стојат на патот. Естонските медиуми истакнуваат дека нивниот изглед би можел да потсетува на таканаречените „мали зелени луѓе“ – војници без ознаки кои биле користени за време на руската анексија на Крим во 2014 година и во првите фази од конфликтот во Донбас.

Естонските власти се сомневаат дека слична тактика од страна на „анонимни униформирани војници“ би можела да биде дел од обидот за тестирање на границата и реакцијата на НАТО, со оглед на зголемените тензии меѓу Москва и балтичките држави.

Преминот „Saatse Boot“ е речиси километарски долг дел од патот што накратко поминува низ територијата на руската Псковска област и ги поврзува населбите во естонската општина Вору. Тоа парче земја ѝ припаѓало на Естонија до 1944 година, а денес претставува една од најнеобичните точки на границата меѓу двете земји.

Реакции од Талин

Иако првите информации предизвикаа загриженост кај јавноста, Марко Михкелсон, претседател на Комитетот за надворешни работи на естонскиот парламент, ги повика граѓаните да останат смирени.

„Останете смирени и фокусирани. Ситуацијата е под целосна контрола на нашите власти“, истакна Михкелсон на платформата Икс.

Инцидентот се случува во време кога Естонија, Латвија и Литванија прават планови во случај на руско воено засилување или напад, вклучително и евакуација на стотици илјади цивили, пренесе Ројтерс. Балтичките држави, кои се членки на НАТО, предупредуваат за агресивните руски воени трошоци и сè почести активности во близина на нивните граници.

Овој нов инцидент на границата со Русија дополнително ја продлабочи загриженоста во регионот дека Москва би можела да ја тестира подготвеноста на сојузниците и да се обиде да ги дестабилизира Балтичките земји преку „хибридни“ провокации слични на оние од 2014 година.