Неколку дена откако круната ја понесе Анастасија Венца, студентка од Московската област, социјалните мрежи и домашните медиуми започнаа да вријат од гласини за можен скандал што го тресе најпознатиот руски избор на убавина.

Според пишувањата на медиумите, се појавиле наводни пораки од натпреварувачките во кои се тврди дека изборот бил однапред наместен, дека критериумите биле нејасни и дека победничката уживала привилегии какви што другите девојки немале.

Пораките што го потресоа настанот

Во објавените преписки од разговори, чиешто потекло и автентичност не се независно потврдени, се наведува дека победничката пристигнала само една недела пред финалето, додека останатите натпреварувачки веќе две недели биле на подготовки и проби.

Девојките чии пораки се цитирани тврдат дека Венца ги избегнувала пробите и ретко комуницирала со останатите:

„Не доаѓаше на проби, молчеше и со никого не разговараше. Ниска е, целата изботоксирана, изгледа како постојано да е пијана. Девојките на кои сите се надеваа дека ќе влезат во топ 3, не стигнаа ни до топ 10. Три недели нè влечкаа и правеа циркус“, стои во една од пораките.

Овие пораки, кои веќе станаа вирални, го отворија прашањето за регуларноста на целиот процес и предизвикаа жестока расправа на социјалните мрежи. Организаторите, меѓутоа, и понатаму молчат – не излегоа ниту со потврда, ниту со демант, што само ги зголеми сомнежите и отвори простор за разни толкувања.

Што е познато, а зашто само се зборува

Она што е неспорно е дека Анастасија Венца навистина е прогласена за „Мис Русија 2025“, што е официјално објавено на веб-страницата на натпреварот.

Оваа година, изборот собра 50 кандидатки од различни региони на Русија, а финалната вечер се одржа на 5 октомври во Москва.

Сè останато – приказните за нејзиното задоцнето пристигнување, прескокнување на проби и тврдењата за „привилегиран третман“ – засега останува во сферата на шпекулации. Тие наводи постојат исклучиво во форма на пораки објавени од „Blic“, а нивната автентичност не е потврдена ниту од страна на организаторите, ниту од самите натпреварувачки под полно име.

Во медиумите се појави и критика на поранешната мис Русија, Ана Лињикова, победничка од 2022 година, која наводно изјавила дека „не гледа како Венца достојно ќе ја претставува Русија на меѓународната сцена“ и дека „ѝ недостасува харизма“.

Иако ваквите цитати беа пренесени од поединечни портали, Лињикова не се огласила преку своите официјални канали, па и овој дел останува непотврден.

Гласини, молк и перцепција

Натпреварот што со години важеше за симбол на убавина, достоинство и национален престиж, сега се соочува со недоверба на јавноста и сомнежи во својата регуларност.

На социјалните мрежи мислењата се поделени: едни сметаат дека се работи за вообичаен постнатпреварувачки револт, додека други уверуваат дека „ова е само врвот на ледениот брег“ и дека време е изборите за убавина во Русија да станат потранспарентни.

Круна под сенката на сомнежот

Без оглед колку долго ќе трае оваа приказна, едно е сигурно – „Мис Русија 2025“ стана многу повеќе од традиционален избор на убавина. Таа стана општествена тема, што отвора прашања колку се ваквите настани денес автентични и дали гламурот служи само како параван за однапред познати исходи.

Додека се чека официјален став од организаторите, Анастасија Венца останува официјална победничка.

Но нејзината круна, наместо да сјае како симбол на национална убавина, сега носи и тежина – тежина на сомнежите и прашањата што сè уште чекаат одговор.