Британскиот министер за енергетика, Ед Милибенд, остро ги критикуваше Илон Маск и Најџел Фараж, обвинувајќи ја десницата дека води „војна“ против чистата енергија и идните генерации.
На конференцијата на Лабуристичката партија во Ливерпул, Милибенд изјави дека Илон Маск, јужноафриканскиот милијардер, се обидува „да им кажува на Британците како треба да ја водат својата земја“.
„Имам јасна порака за Илон Маск: губи се од нашата политика и од нашата земја“, му порача тој.
Според пишувањата на британскиот „The Times“, Милибенд потоа го нападнал и лидерот на „Reform UK“, Најџел Фараж, поради ставовите на неговата партија за зголемена експлоатација на нафта и гас.
„Би уништиле сè што досега правевме. Тие планираат да водат војна против чистата енергија – култура на конфликти што ја увезуваат од САД, поттикната од богати и моќни интереси кои ги финансираат“, рече Милибенд.
Министерот нагласи и дека лично е посветен на климатската политика:
„Неверојатно сум горд на британското и лабуристичкото лидерство во климатските прашања. Војната на „Reform“ против иднината би била предавство за секој млад човек во нашата земја – и за оние што допрва ќе дојдат“.
Милибенд посебно се осврна на праксата на вадење нафта и гас, која во Велика Британија е главно забранета од 2019 година.
„Фракингот е опасен и длабоко штетен. Нема да ги намали сметките, не создава долгорочни работни места и ги уништува нашите климатски обврски. Нашите заедници веќе еднаш победија во оваа борба – и ќе победат повторно“, истакна тој.
Министерот остро ги критикуваше и конзервативците, особено обидите за укинување на забраната за фракинг, предводени од Џејкоб Рис-Мог.
„Ајде да го забраниме фракингот еднаш засекогаш и да ја испратиме оваа група ‘фракери’ таму каде што им е местото“, порача Милибенд.
