Имамот Салех Абуеленен од шведскиот град Кристијанстад, кој во понеделник ја вознемири шведската јавност со проповед во која објаснуваше како и во кои случаи мажот „има право да ја удри својата жена“, доби итен отказ. Исламската заедница во Кристијанстад во подолга објава на „Facebook“ соопшти дека Абуеленен повеќе нема да предводи молитви во нивната џамија.
„Салех Абуеленен доброволно и привремено ги предводеше молитвите, но никогаш не бил официјален имам на нашата заедница. Управниот одбор реши да го суспендира. Го молиме Алах да ја заштити нашата татковина Шведска и нашето општество од секакво зло и да ни даде сила да продолжиме да ѝ служиме на нашата земја“, стои во објавата на Исламската заедница.
„Исламот забранува насилство врз жени“
Меѓу другото, Управниот одбор потенцира дека „исламот преку своите експлицитни текстови ги забранува сите облици на насилство и малтретирање на жените. Исто така нагласува еднаквост на мажите и жените по потекло и човеково достоинство. Исламската заедница е горда што е во Шведска и ја потврдува својата целосна посветеност на шведскиот закон кој ги штити човековите права“.
Постојаниот имам на џамијата во Кристијанстад, Шаабан Абу Зур, за шведската јавна телевизија „SVT“ изјави дека членовите на Исламската заедница силно реагирале и се оградиле од спорната проповед. „Го прекинавме неговиот ангажман, мораме да бидеме сигурни дека Абуеленен оди во исправна насока“, објасни Абу Зур.
Општинските власти ја поздравија одлуката
„Ја поздравуваме одлуката на Исламската заедница да ја прекине соработката со имамот. Важно е заеднички да се залагаме за правото на секој човек да живее без никакво насилство“, изјави Ричард Бергрен, функционер на општината Кристијанстад, каде што меѓу 86.000 жители околу пет проценти се муслимани.
