Ова не е само краткотраен студен бран. Температурите ќе се спуштат под нулата, а на планинските врвови се очекува снег. Ветровите веќе се свртени од исток и североисток, влечејќи студен воздух од Русија кон срцето на континентот.

Студената инвазија започнува кон средината на неделата, но својот врв ќе го достигне во четврток и петок. На околу 1.250 метри надморска височина, температурите ќе паднат под нулата, што е за дури 10 степени Целзиусови под просекот за почетокот на октомври. Во некои региони, ќе биде и до 15 степени постудено од вообичаено.

„Ова ќе биде најстудениот период од оваа метеоролошка есен за поголемиот дел од Европа“, предупредува „Severe Weather Europe“, нагласувајќи дека многу земји ќе го почувствуваат првиот мраз во сезоната.

Централна Европа под мраз, Балканот на ред за викенд

Најмногу ќе бидат погодени земјите од Централна Европа: Германија, Чешка, Словачка, Австрија, Унгарија и Словенија ќе се соочат со температури околу нулата или неколку степени под неа – особено во четврток и петок.

Потоа студениот бран ќе се прошири и кон Балканот и Медитеранот. Западниот дел на Балканот, вклучувајќи ја Хрватска, Босна и Херцеговина и Црна Гора, за време на викендот ќе бележат утрински температури од -2 до -5 °C.

Јужна Србија, Македонија и западна Бугарија може да очекуваат температури и до -6 °C.

Дожд, снег и бури

Студената воздушна маса ќе се судри со потоплиот медитерански воздух, носејќи дожд и бури, особено во Грција. На поголемите надморски височини ќе има врнежи од снег од четврток до недела во јужна Босна и Херцеговина, Црна Гора, североисточна Албанија, Македонија и западна Бугарија.

Нормализација на времето од недела

По овој силен студен бран, кој ќе трае до сабота, се очекува олеснување. Кон крајот на неделата, зонскиот проток од северниот Атлантик повторно ќе донесе потопли воздушни маси, со нагло затоплување во недела и во текот на следната недела.